Bizkaiko Foru Aldundiak, zortzigarren urtez, Bizkaiko DBHko ikasleei eskola agendak banatzeko programa jarri du abian, ikasturtearen hasierarekin batera. Bizkaiko Foru Aldundiko Kultura Sailak egin ditu agenda horiek eta, ikasleentzat "erakargarri bezain erabilgarria den euskarri baten bitartez", bizkaiera sustatzea dute helburu nagusi.
Horrela, bada, urtero, Bizkaiko gazteen prestakuntza osatzeko asmoz, gai interesgarri bat aukeratzen saiatzen dira, gai horri buruzko datuen bidez agendari aberastasuna ez ezik balio erantsia ere emateko. Oraingoan, komunikazioaren teknologiei, esaterako, Interneti, heldu diete, eta teknologia horiek hizkuntza bat hedatu eta erabiltzeko eskaintzen dituzten aukerak jasotzen dituzte. Beraz, euskara moduko hizkuntza gutxitu bat sarearen bidez munduan nola agertu eta hedatu daitekeen jasotzen dute.
Bizkaiko eskola konfederazioek dute eskola agendak DBHko ikasleen artean banatzeko ardura, kanpainak zortzigarren urtea betetzen duen honetan.
Bizkaian DBH egiten duten 27.000 ikaslek jasoko dituzte Bizkaiko Foru Aldundiaren Kultura Sailak ematen dituen bizkaierazko eskola agendak, tartean Uribe Kosta eta Erandioko milaka ikaslek ere izango dute beren egunerokoa. Kulturak ohar prentsa batez zabaldu duenez, "agendak banatzeko ekimena dagoeneko ondo errotutako jarduera da". Gainera foru iturrien arabera, agendak hainbat helburu betetzen ditu, tartean "euskararen erabilera sustatzea, agenda erakargarri bezain praktiko eta erabilgarri hauen bidez; izan ere, bizkaiera erabiltzeaz gain, gazteentzat interesgarri diren gaiak jasotzen dituzte. Aurtengo agendak, esaterako, komunikazioaren teknologiak eta teknologia horiek hizkuntzak hedatzeko duten balioa dute ardatz". Argazkian, Sopelako Ander Deuna ikastolako DBHko 1. mailako ikasleak UKBERRI.NET Uribe Kostako digitala ezagutzen, Koska irratiko egoitzan 2006ko irailean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun