Itxartuk antolatutako ibilaldi neurtuan 1.100 lagunek baino gehiagok parte hartu dute
Eguraldi beroa, hegoaldeko haizea eta zerua lainotsua zutela, atzo egin zuten Algortako Itxartu Taldeak antolatzen duen ibilaldia neurtuaren 26. edizioa. Guztira 1.127 pertsonak esku hartu zuten. Pozez gainezka, Itxartuko presidente Ricardo Ansoteguik esan zuenez, “kopuru hau errekor berria da eta inoiz gainditu gabeko mila partaideen kopurua gainditu dugu lehen aldiz”. Nagusiek goizeko 8rak jo gabe abiatzen hasi ziren, 17 kilometroko ibilbidea egiteko. Denera 650 lagunek egin zuten biderik luzeena. Lehen 50 bikoteek sari bana jaso zuten eta, horien artean, Sopelako Conchi eta Felipe izan ziren irabazleak, Sopelako Naiara eta Ruben bigarrenak eta Algortako Oscar eta Bilboko Diana hirugarrenak. Sari berezien artean, aurten hamarna urteko Joseba eta Alex algortarrek jaso zuten txirrindula bana, beti bezala Zodiakoz tabernak emanak, hobeto sailkatutako 16 urtetik beherako lehenengoak izateagatik. Eta partaide zaharrenei dagozkien sariak Portugaleteko senar-emazte Carmenek eta Manuelek eskuratu zituzten. Argazkian, bizikleta bana irabazi zuten Josebak eta Alexek.
Goizeko 9ak inguruan, gaztetxoek (denera 220), gehienak bere gurasoetako baten laguntzaz (180 laguntzaile), 6 kilometroko ibilbide laburragoari ekin zioten. Ohi denez, lehiari baino parte hartzeari, kirolari eta gozamenari garrantzi handiagoa eman nahian, antolatzaileek ez zuten sailkapenik egin eta partaide guztiei sari berdina eman zieten. Goizerdiko 11ak jo ondoren bi pilota partida jokatu ziren batzokiko jolasgunean. Izan ere, partida hauek irailaren 13an jokatzekoak ziren, Itxartu Egunean, baina eguraldi kaskarrak bertan behera uztera behartu egin zituen antolatzaileak. Pilotariak jo eta ke ari ziren bitartean, mendigoizaleak hasi ziren iristen eta Itxartuko kideek (Ibilaldi honetarako 75 baino gehiago aritu ziren lanean) prestatutako parrilako janariei gupidarik gabe egin zioten eraso, edariaz lagunduta. Pilota partida hauetan txapelduna eta txapeldunordeak hauexek izan ziren: benjamin mailan, Markel Cabello eta Unai Ziarsolo; kimuetan, Oiek Gorostiaga eta Mikel Lekunberri; haurren artea, Iker Bilbao eta Ander Fullaondo; eta kadete mailan Antton Basarte eta Jon Aitor Calvo.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun