Eneko Abasolo “Abarkas” iurretarrak irabazi du Mendexako kanporaketa
2008ko urr. 13a, 20:20
Igandean, urriak 12, abiatuko zen aurtengo Bizkaiko Bertsolari Txapelketa, Mendexako frontoian egindako lehenengo kanporaketaren bitartez. Hain zuzen ere, Eneko Abasolo “Abarkas” iurretarrak irabazi zuen saioa, finalaurrekoetara zuzenean sailkatuz. Hurrengo kanporaketa larunbatean, urriak 18, izango da Zeanuriko frontoian, 17:30etik aurrera. Eta bertan sartuko dira norgehiagokan Uribe Kosta eskualdeko hainbat ordezkari. Arrate Illaro Ipar Uribeko txapelduna eta Itxaso Paya izango dira protagonistak eta Igor Elortza, Iñaki Iturriotz, Iker Belaustegi eta Eñaut Uruburu gainditzeko mutilak. Mendexako kanporaketako puntuazioak, kronika, ikus-entzunezkoak, argazkiak,… www.botasarean.biz webgunean ikusi eta jarraitzeko aukera dago. Webgune berberan, laster, abenduaren 20an, Barakaldoko BEC-en egingo den finalerako sarrerak erosteko aukera ere izango da. Kanporaketa guztietan, hala ere, dagoeneko salgai daude sarrerak. Bitartean, Bilboko Udaleko Euskara Sailaren laguntzaz, Bizkaiko Bertsozale Elkarteak antolatzen dituen saio osagarrien barruan, Jon Enbeita bertsolari eta bakarlariaren kontzertua izango da bihar, urriaren 14an, 20:00etan, Bilboko Kafe Antzokian. Argazkian, Eneko Abasolo.Mendexako frontoian jende asko batu zen atzo, 400 lagun inguru. Nabarmentzekoa da jende gazte asko izan zela entzuleen artean. Bertsolariek animatzaileak ere izan zituzten entzuleen artean. Gernikako Xabier Enbeita animatzeko “Egurre Xabi! Zeurie da trikornixue” jartzen zuen pankarta egon zen jarrita frontoi atzean. Hala ere, Eneko Abasolo “Abarkas” iurretarrak irabazi zuen (392,5 puntu) lehenengo kanporaketa, finalaurrekoetara zuzenean sailkatuz. Atzean geratu ziren Eñaut Intxaurraga (380,5), Xabier Enbeita (365,5), Garikoitz Sarriugarte (364), Olatz Ibarluzea (342,5) eta Xabat Galletebeitia (338,5). Kanporaketako bertsolariek, txapelketako irudia daukaten taza parea eraman zuten oroigarri. Jon Bollar Lea Ibarra Mankomunitateko presidenteak eman zien bertsolariei oroigarria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun