Datorren azaroaren 15ean, larunbata, ospatuko da Algortako Txiki eta Otaegi plazan IX Indabada Mundiala. Algortako Gazte Asanbladak Txorimalo gaztetxearen bitakoran jakinarazi duenez, babajana herrikoia eguerdiko 1etan abiatuko dute, bazkari herrikoiarekin. Ondoren, jolasak, zozketak, musika eta bestelako jarduerak izango dira, bazkalostea animatzeko. Plaza ganoraz bildu eta atondu ostean, txikiteoaren ordua helduko da, eta baita herriz aldatzeko tenorea ere, jaialdiak Getxoko Txorimalo gaztetxean jarraituko baitu, urteroko gaupasa dela medio. Txartelak laster jarriko dituzte salgai ohiko lekuetan. Iaz inoiz baino lagun gehiago batu ziren, 600 bat pertsona, ekitaldia Algorta, Getxo eta Berangoko hainbat gazteren atxiloketak salatzeko ekimen bihurtu zela. Argazkiak hemen ikus daitezke. Bestalde, Txorimalo gaztetxeak hainbat film proiektatuko ditu, hamabostean behin, datozen asteotan: "El expreso de medianoche" (urriak 19), "Los falsificadores" (azaroak 9) eta "Interestatal 60" (azaroak 23). Hitzorduak igandeetan izango dira, 19:00etatik aurrera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun