Hein handiko dinamizatzailea hartu berri du Berbalagun egitasmorako Egizu Getxo euskaldun! elkartean: Beñat Vidal bertsolari leioaztarra dugu bera eta aste honetan hasi da buru-belarri lanean. Arratsaldero egongo da euskara elkarteak Algortako Aldai Kulturgunean (Karitate kalea, 1) daukan bulegoan. Izan ere, oraindik ere izena eman daiteke Berbalagun egitasmoan, Egizuk jakinarazi duenez. "Epea zabalik dago urriaren amaiera arte. Taldeak norberaren egun eta ordutegi librearen arabera antolatuko ditugu. Idatzi (egizugetxo[abildua]gmail.com) edo deitu (944 914 357 / 619 935 541) eta zure datuak hartuko ditugu. Azaroaren lehenengo astean jarriko dira taldeak martxan", gaineratu dute. Dagoeneko larunbat honetarako plan ederra prestatu dute. Goizean, Gorbeia (1.475 metro) mendira joango dira eta, arratsaldean, Zeanurira, Bizkaiko Bertsolari Txapelketako bigarren kanporaketaz (17:30ean, frontoian) gozatzera. Argazkian, berbalagunak Lea ibarrara egindako azken txangoa / Egizu.
Bertan sartuko dira norgehiagokan Uribe Kosta eskualdeko hainbat ordezkari. Arrate Illaro Ipar Uribeko txapelduna eta Itxaso Paya izango dira protagonistak, algortarrak biak, eta Igor Elortza, Iñaki Iturriotz, Iker Belaustegi eta Eñaut Uruburu gainditzeko mutilak. Egizukoek argitu dutenez, "8:30ean jarri dugu hitzordua Telletxeko parkinean, guztiok batera joateko. Aukera egongo da mendira bakarrik joateko bertso saiora joan nahi ez duenarentzat. Kotxeena, betiko moduan, erman dezakeenak abisatu dezala eta moldatuko gara, inor etxean geratu ez dadin. Telefonoz edo emailez abisatu dezakezue etorriko zareten edo ez". Bestalde, urriaren 30ean, saio berria egingo du Uribe Kostako Irakurzaleen Txokoak. Oraingoan, Jon Martinen "Ero" ipuin bilduma aukeratu dute aurretik irakurri eta egun horretan berarekin komentatzeko. Solasaldia 20:00etan izango da, Aldai kulturgunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun