Ogra Shinn Fein-eko gazte irlandarrek hitzaldia eman dute Leioako campusean

Kamaradak Gazte Internazionalisten Sareak gonbidaturik, herenegunetik urriaren 22ra bitartean, Euskal Herrian izango dira Ogra Shinn Fein-eko 15 bat brigadista irlandar. "Egun hauetan zehar gaztetxeetako dinamikak, ikasle dinamikak, etxebizitzaren problematika, ingurumenarekiko proiektu txikitzaileak, egoera politikoa, irrati libreak eta beste proiektu komunikatibo batzuk gertutik ezagutzeko aukera izango dute irlandar gazteek. Era berean, haiek Irlandako errealitatea gerturatzeko aukera izanen dute", azaldu dutenez. Horien artean, azpimarragarriena Irlandako bake prozesua azaltzeko emango dituzten hitzaldiak. Atzo, hilak 16, Leioa eta Erandioko campusean eman zuten lehenengoa, 60 lagunen aurrean eta hurrengo astelehen eta asteartean Ibaetako (Donostia) Filosofia eta Hezkuntza Zientzien Fakultatean eta Gasteizko campusean emango dituzte hitzaldiak, hurrenez hurren. Biak ala biak 11:30ean izango dira. Halaber, azken egun horretan Zaramaga auzo gasteiztarreko Paddy Short tabernan izango dira 19:00etan. Argazkian, atzoko hitzaldia Leioako campusean.