Getxo Antzokiko besaulkietako bat etxera eramateko aukera emango dute igandean
2008ko urr. 17a, 22:17
Orain arte ezagutu dugun Getxo Antzokiari azken agurra emateko eguna izango da igandea. Etzi antzokiko besaulkiak kenduko dituzte eta aretoa garbituko dute urriaren 24an eta 25ean I. Getxo Sound Jaialdia eta azaroaren 1ean Elaudi eta Ken Zazpi taldeen kontzertuak egin ahal izateko, azken hauek Iparra Galdu Gabe jardunaldien barruan. Antzokiko arduradunek adierazi dutenez, 1928tik 1992ra bitartean Gran Cinema izan zenari, eta ordutik Getxo Antzokia denari, agur esan nahi diotenek igandean bertatik pasatu ahal izango dira eraikin ezaguna historia argazki erakusketa baten bidez gogoratzeko, oroitzapenerako argazkiak ateratzeko edo urte hauetan guztietan zehar hainbeste bizipen jaso dituzten besaulkietako bat eskatzeko. Ordutegia 11:00etatik 14:30era eta 17:00etatik 21:00etara izango da. Argazkian, Getxo Antzokia ateak itxita / Sotavento.Behera botako duten eraikina Algortako Gran Cinema izan zen urte askotan, "Florentino Elorriaga, Eugenio Eguia eta Carmelo Araluce algortarrek bultzatutako kultur ekimen aintzindaria, udalerria astindu zuena", udal iturrien arabera. 1928ko irailaren 15ean inauguratu zen Ronald Colman protagonista zuen "Beau Geste" filmearekin. Hasiera batean aretoak 620 besaulki zituen eta ez zuen pelikulen emanaldiak bakarrik hartzen; bertan, zarzuela konpainiak, abesbatzak, "variete" edo askotariko ikuskizunak eta boxeo gau jaialdiak ere egon ziren. Azken horiek egin ahal izateko lehenengo besaulki ilarak kentzen zituzten. Udaldian kanpoko zabalgunea orkestra txikiek alaitutako dantzaldiak egiteko aprobetxatzen zen. 1992an, eta gorabehera askotxo bizi eta gero, "berrinauguratu" zen "Getxo Antzokia" izenarekin, eta etorkizunean ere izen bera edukiko du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun