Azken bost antzezlanak eskainiko dituzte asteburuan aurtengo Getxoko Antzerki Jardunaldiek
Asteburu honetan amaituko dira Getxoko XXVI. Antzerki Jardunaldiak, eta larunbatean eta igandean bost saio izango dira, horietako lau, haurrentzako ikuskizunak. Bihar, helduek Kunka taldearen azken lanaz gozatzeko aukera izango dute: "Sexo gratis". Ikuskizunak sexu-fantasiak ditu ardatz nagusi, eta saioa Algortako Getxo Antzokian izango da, 20:00etan, 9 euroren truke (7 euro gazte txarteladun eta jubilatuak). Antolatzaileen esanetan, "Sexo gratis" lanean bi gizon eta bi emakumek antzeztokira igotzea erabakitzen dute eta elkarri euren fantasia erotikoak kontatzen dizkiote. Bien bitartean, gainerako ikusleek "voyeur" bezala arituko dira. Bakoitzak bere fantasia kontatuko du, eta gainerakoek interpretatu egingo dute. Aktoreek fantasien eszenifikatzeak eten ahal izango dituzte, ikusleekin zein beren artean hitz eginez. Argazkian, "Sexo gratis" antzezlanaren pasarte bat.
Gaztetxoek ere antzerkiaz gozatzeko aukera izango dute asteburuan, haientzako lau lan antzeztuko dira-eta. Horrela, bihar, "Ni natura naiz" kale-ikuskizuna aurkeztuko du Kiki, Koko eta Moko pailazo hirukoteak Algortako Telletxe plazan, 13:00etan; arratsaldean, "Harritzeko ipuinak" eskainiko du Bihar taldeak Areetako Andres Isasi Musika Eskolan, 18:00etatik aurrera, 2 eurotan. Igandean, berriz, Ganso Teatro taldearen "Renato" lanaz gozatzeko aukera izango dute txikienek Telletxen, 13:00etan; azkenik, Dar-Dar taldeak "Andersen, el patito feo" ikuskizuna antzeztuko du Andres Isasin, 18:00etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun