Areetako Santa Ana kaleko ezkiak mozteko, Getxo Udal Ingurumen Arloak egingo dituen lanak direla eta, Kale Nagusia eta Gobela kalearen arteko bide zatia zirkulaziorako itxita egongo da astearte honetan, urriak 21. Zirkulazioa egun osoan egongo da etenda. Hori dela eta, seinaleei adi egoteko eta lan horiek eragin ditzaketen trabak barkatzeko eskatu dute udal arduradunek. Guztira, 12 ezki handi ebakiko dituzte, "inguruan dauden etxeetako fatxadetatik 3 metrotara baino ez daudenez, bertako bizilagunei arazoak eragiten dizkietelako", tokiko agintarien arabera. "Arbola mozketa hau egiteko arrazoien artean ere badago, bertako bizilagunei eragindako arazoak ekiditeko azken urteotan arbola hauei egin zaien inausketaren eraginez oreka galdu dutela, gero eta itxuragabetuago eta gero eta okertuago daudela. Eta egoera horrek arriskua eragin lezake", gaineratu dute. Argazki gehiago hemen ikus daitezke.
Udal Ingurumen Arlotik aipatu dutenez, "espaloi estu baten gainean daude landatuta eta horren eraginez ere beren sustraiak saneamendu, telefonia,... hoditerietan arazoak ari dira sortzen". Aipatzekoa da mozketa Santa Ana kalean egingo dela bakarrik, "auzoko erdigunetik urrutien dagoen kaleetako bat delako". Gune horretako erdigunean izan du, historikoki, leku naturala ezkiak. Asteartean moztuko diren 12 ezkien ordez, beste horrenbeste arbola landatuko dituztela aurreratu du Ingurumen Arloak: "beste espezie batekoak, aipatu kalean dagoen espaloiaren zabaleran ondo sartzen dena, bizilagunentzat arazo gitxiago eragingo duena eta inguruko paisaiarekin guztiz bat datorrena", arduradunen hitzetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun