Harrera ona izan dute atzo bertan amaitu ziren Getxoko XXVI. Antzerki Jardunaldiek. Guztira, 4.000 bat lagun baino gehiago egon dira bi astetan zehar eskaini diren 14 ikuskizunetan, Getxoko Kultur Etxeak jakinarazitakoaren arabera. Horrela, urriaren 9tik 19ra, publikoak lan anitzez gozatu ahal izan du. Aurten helduentzako eta haurrentzako obrak eskaini dira, kalean eta estalpean. Ohi bezala, Algortako Getxo Antzokian izan dira helduentzako lanak. Aurten honako ikuskizun hauek eskaini dira bertan: "Ohean" (Maskarada), gau bakarreko harremanen inguruko lana; "El jefe de todo esto" komedia Ados taldearen azken ikuskizuna; "Secando charcos" (Agerre Teatroa), bikote-harremanen mundua abiapuntu duen istorioa eta, azkenik, Kunka taldearen "Sexo gratis" sexu-fantasiaren inguruko komedia.. Azken lan hori eta "El jefe de todo esto" izan dira lanik arrakastatsuenak, horietako bakoitzean 400 ikusle egon ziren eta. Hain zuzen ere, horiek izan ditu azken antzerki saioak Getxo Antzokiak: urriaren 24an eta 25ean I. Getxo Sound Jaialdia eta azaroaren 1ean Elaudi eta Ken Zazpi taldeen kontzertuak egin ostean itxi eta bota egingo dute. Gran Cinema izan zenari agurra egiteko, antzinako argazkiak ikusi, bertan argazkia atera eta besaulkietako bat eskuratu ahal izateko zozketan parte hartzeko aukera izan zuten bertara joan zirenek. Argazkian, atzoko eguna Getxo Antzokian. Argazki gehiago hemen ikus daitezke.
Algortako Telletxe eta San Nikolas plazetan ere kale-antzerkiaz gozatu ahal izan du publikoak. Aurten, gainera, horiek izan dira jendetsuenak. Simulacro Teatro talde getxoztarrak "Con el bulto en la espalda" ikuskizunak 500 pertsona bildu zituen. Bestalde, Organik taldearen "Malditas" antzerki eta dantza ikuskizunean 400 lagun baino gehiago egon ziren. Ohikoa denez, arreta berezia eskaini zaie haurrei. Aurten zortzi lanez gozatu ahal izan dute txikienek eta horiek ezin hobeto erantzun diote programari. Haurrentzako obrak Telletxen eta Areetako Andrés Isasi Musika Eskolan antzeztu dira. “Superplast” (Hortzmuga taldea), “Egipton gertatuak” (Potxin eta Patxin) "Ni natura naiz" (Kiki, Koko eta Moko) eta "Renato" (Ganso Teatro) lanak izan dira kaleko ikuskizun arrakastatsuenak eta horietako bakoitzean 300 ikusle egon dira. Horiez gain, gaztetxoenek honako lan hauetaz ere gozatu dute: "A través de África", "Zorionak Zuri", "Harritzko Ipuinak" eta "Andersen, el patito feo"
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun