Getxo udalerriko wi-fi guneen mapa aurkeztu du gaur tokiko Alderdi Popularrak, euren hitzetan, "gure webgunean jaso ditugun 272 eskaera baino gehiago kontuan hartuta egin duguna". 2007ko udal batzarrean, udal egoitzetan eta plazetan kablerik gabeko Internet sarea jartzea bideragarria ote den aztertzea eskatu zion Udalari Getxoko PPk. Mozioa aho batez onartua izan zen. "Gobernu Taldeak ezertxo ere egin ez duela begi bistan denez, Alderdi Popularrak etxeko lana egin dituela adieraziko diegu arratsaldeko Hirigintza Batzordeko bilkuran", aipatu du Alvaro Rodriguez zinegotziak. Batetik, udalerriko kultur etxe, liburutegi eta kiroldegi guztiak barne hartzen ditu popularrek proposatutako wi-fi mapak. Horietan, doakoa izango litzateke Interneten nabigatzea. Bidezabalen, Telletxen, Xaken, Getxo aldean, Aixerrotan, Ereagan, Txurruka kaian edota Gobelaurren, baina, udal webgunera (www.getxo.net) sartzea baino ez litzateke musutruk izango, Rodriguezek proposatutakoaren arabera. Argazkian, Getxoko PPko zinegotziak udal batzar batean. Mapa hemen ikus daiteke.
Gainontzeko webguneak kontsultatzeko ordaindu behar izan arren, besteak beste, familia ugarientzako deskontuak aurrikusten ditu Getxoko PPk. Hala ere, Getxo udalerrian Interneten dohainik nabigatzeko aukera ematen duten bi kzgune daudela ahaztu omen zaio ordezkari popularrari: "(Gobernu taldeak) egin dugun lan hau onartu eta, hemendik hilabete gutxira, sarea funtzionatzen hastea espero dugu. Izan ere, orain, kultur etxeetan baino ez dago ordenagailu publiko batez bidez konektatzeko aukera, ordu erdiko 1,20 euro ordainduta gainera", adierazi du Rodriguezek. Beharrezko azpiegitura, berriz, "merkea" dela dio. "Publizitate bidez autofinantzatu daiteke", PPko zinegotziak gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun