Krisialdi ekonomikoari aurre egiteko neurrien artean, Jose Luis Rodriguez Zapatero Espainiako Gobernuko presidenteak PSOEren izenean Espainiako aurrekontu guztiak –estatu mailakoak, autonomikoak, foru-aurrekontuak eta udalerrietakoak– babesteko konpromisoa hartu zuen. Beranduago, PSOEtik "Eusko Abertzale Ekintzaren udalerrietako aurrekontuak izan ezik" zehaztu zuten. Orain, berriz, Getxoko PSE-EE Zapateroren hitzei bestelako aterabideak bilatzen dabil, alderdiaren diziplinaren barruan jarduteko, Imanol Landaren taldearekin duten gatazka mantentzen duten bitartean. Hortaz, Luis Almansa Getxoko PSE-EEren bozeramailea argitu duenez, Zapateroren hitzek "ez dute gure politikan aldekatarik eragingo". Almansaren aburuz, "Zapatero presidentearen adierazpenak gure norabide berean doaz. Gure udalerriko aurrekontuen zirriborroa aurkez diezaguten nahi dugu, alternatibak agertu ahal izateko".
Alderdi konstituzionaleko bozeramaileak, iaz bezala aurrekontuak luzatzea gaizki ikusiko luke, "Espainian egun dagoen krisialdiari begira". Bere ustez, "aurrekontu egonkor bat behar da, garaiarekin bat egiten duena". Dena den, EAJ eta Imanol Landaren taldeari egotzi die gerta daitekeenaren errua: "akordio batera heldu nahi dela esatea baina, Getxon bezala, beranduago oposizioari zirriborroa ez aurkeztea ez da zilegia. Ekintzetara pasatu behar da behingoz eta horren ardura Gobernu Taldeari dagokio zuzen-zuzenean".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun