Udaleko idazkariaren eta EHUko bi katedradunen txostenak oinarritzat hartuta, Udal Arautegi Organiko berriaren onarpena udalbatzaren ondorio jurdikorik gabeko borondatearen agerpena zela "ulertu" zuen Imanol Landa alkateak, hori indarrean jartzeari uko egiteko. Gaurko prentsaurrekoan ere defendatu du udal agintariak, UOA berrirako proposamenak "legez ezarritako prozedurak bete ez zituelako (dagokion Informazio Batzordetik ez zen pasa eta ez zuen beharrezko txosten teknikorik eta juridikorik)" hartu zuela erabakia. Marisa Arrue Getxoko PPren bozeramaileak, baina, beste ñabardura bat eman nahi izan dio auziari, begiak abenduaren 2ko epaiketan jarrita. "Fiskaltzaren arabera, ekinaldi administratiborik ez egoteak (oposizioko alderdien) politikan parte hartzeko eskubidearen urraketa ekarri duela dio Fiskaltzak", azaldu duenez. Eta, horrek, "onartutako arautegia bere horretan aplikatzea" ekarriko luke, bere ustez. Hala ere, Arruek berak onartu du gaur ezagutarazitako sententziak kontrakoa dioela, hau da, "gaia osoko bilkuran eztabaidatuta, eskubide hori bermatua izan zela". Landak zein Arruek arautegia eztabaidatzeari uko egitea egotzi diote bata besteari.
Gobernua oposizioan
Bitartean, oposizioko alderdiei eskua luzatu aurretik, PPk eta PSE-EEk onartutako UOA berriaren "demokraziaren aurkako izaeraz" luze aritu da prentsaurrekoan udal agintari jelkidea. Are gehiago, udal batzarrean daukaten gehiengoa baliatuta, "oposiziotik gobernatu nahi izatea" egotzi die biei. Arautegia osatzen duten "234 artikuluetatik 54 (%23,08) eta 9 xedapen gehigarrietatik 4 legediaren araberakoak izan ez edo irregulartasun garrantzitsuak" dituztela alde batera utzita, aipatu bosgarren xedapena gaitzetsi du guztien gainetik Landak. Horren arabera, gaikako informazio batzordeak EAJko 4 zinegotzik, PPko beste 4k, PSE-EEko 2k eta Ezker Batuako batek osatuko lukete behin betiko, "udal hauteskundeen emaitzak edo beste talde batek ordezkaritza lortzen duen kontuan hartu gabe". Bestalde, "alkatearen eskuduntzetatik gehienak udalbatzaren eskuetara joango lirateke eta premiazko mozioen erabakiak bete beharrekoak izango lirateke", Landaren hitzetan.
Hala ere, PSE-EEkoekin tematu da guztiz alkatea. Landak bere buruari galdetu dio “honelako zenbat epai behar ote dituen Getxoko PSE-EEk benetako eta eraikitzailea den politikagintzaren, lan positiboaren eta getxotarren bizi-baldintzak hobetuko dituzten politikeen aldeko akordioaren bidera etortzeko”. Sozialisteei eskatu die “PPren estrategiaren menpe gehiago ez egoteko, herritarrentzat akordio garrantzitsuak lortzea galarazi ezezik udalerria geldiaratzen duelako”. Espainiako Gobernuko presidente Jose Luis Rodriguez Zapaterok sozialistak oposizioan dauden udaletako aurrekontuak onartzea ahalbidetzeko eskatu die berriki bere zinegotziei, egoera ekonomiko zailaren aurrean gaudela. Eta horri ere heldu dio Landak. Horren harira, Getxoko sozialisteen bozeramaile Luis Getxoko PPk eta Almansak egindako adierazpenek "zalantzak" eragin dizkiote alkateari. Landaren iritziz, bozeramale sozialistak "honegatik guztiagatik herritarren aurrean erantzun beharko du".
Udal Arautegi Organiko berri bat negoziatzen hasteko prest daude Getxoko EAJ eta PP
Getxoko PPk eta PSE-EEk onartutako Udal Arautegi Organikoa (UAO) indarrean ez jartzeagatik, Imanol Landa alkateak "zinegotzien eskubideak urratu" zituenik ez du uste Bilboko Administrazioarekiko auzi-epaitegiko 3. aretoak. Gaur eman du ebazpenaren berri udal agintari jelkideak. Orain, errekurtsoa aurkezteko aukera edukiko dute popularrek eta sozialistek. Auziaren muinean dago, 2007ko azaroaren 8an, Udalbatzak ezohiko osoko bilkuran onartu zuen UAO indarrean jartzeari Landak emandako ezetza. Horretarako, udal idazkariaren eta EHUko bi katedradunen txostenak oinarritzat hartu zituen. Gaur, sententzia ezagututa eta PSE-EEk eta PPk egindako arautegia "irregulartasun garrantzitsuak" dituela errepikatu eta gero, adostasunaren aldeko deia egin du alkateak. Iragarri duenez, azaroan oposizioko alderdiak deituko ditu, "indarrean diren lege-prozedura guztiak beteko dituen eta guztien artean adostutako UAO berri bat prestatzeko lanean hasteko". Bada, prentsaurrekoa egin eta ordu gutxira, oharra plazaratu du Getxoko PPk balizko negoziazio horretan parte hartzeko prest daudela adieraziz. Hori bai, aurretik, "ez erratzeko" eskatu dio Marisa Arrue popularren bozeramaileak Landari. Iazn ere, oraindik ere, gai horren inguruko beste epaiketa bat dago abenduaren 2an, Bilboko Administrazioarekiko auzi-epaitegiko 5. aretoan. Hain zuzen ere, oposizioko alderdiek onartutako Udal Arautegi Organikoa indarrean jartzea "bete beharreko erabakia den ala ez" ebatziko duena. Argazkian, Marisa Arrue eta Luis Almansa Getxoko PPko eta PSE-EEko bozeramaileek otsailaren 27an aurkeztu zuten Imanol Landaren aurkako demanda.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun