Udal iturriek diotenez, "Sopelako turismo bulegoak lan eskerga egin du udan zehar gure kostaldean egin diren nazioarteko hainbat kirol lehiaketatan, hala nola, Joko Atlantikoak, Island Style Pro Junior surf txapelketa eta BBK Pro Bodyboard proba. Hala ere, lehiaketa guztien artean agian oihartzun handiena Billabong Pro, munduko surf txapelketak izan du". Lehiaketa honen lehen eguna Sopelako uretan egin zen, eta horrek "mundu mailako entzutea" eman zion herriari.
Sopelako udaletxeko turismo bulegoak eta Larrabasterran jarri zuten informazio guneak 5788 kontsulta jaso zituzten ekainaren 14tik irailaren 14ra, udako denboraldiak iraun zuen bitartean, tokiko iturriek adierazi dutenez. Turismo bulegoa urte osoan zehar dago zabalik, baina informazio gunea udako denboraldian baino ez da lanean aritzen. "Lehen hilabetetik bi bulegoek sumatu zuten turisten joan-etorri handia, eta udak aurrera egin ahal, kopuru hori etengabe handitu zen", azaldu dute udal arduradunek. Emandako datuen arabera, Erabiltzeile gehienak Euskal Herrikoak izan dira, 2.418 lagun, eta hauei sopeloztarrek eginiko 1.602 galdeketa gehitu behar zaizkie. Atzerritarren bisitei dagokienez 1.273 pertsona zenbatu dira, Italiakoak, Erresuma Batukoak, Alemania eta Frantziakoak gehienak. Azkenik, Espainiako turisten 495 galdera jaso dira. Bulego batera zein bestera doazen lagunen profila erabat ezberdina da: udaletxean, Sopelako herritarren galderak izan dituzte, batik bat. Larrabasterrako informazio gunean, ordea, Euskal Herriko gainontzeko lekuetatik iritsitakoen eta kanpotarren kontsultak jaso dituzte. Argazkian, udaletxeko turismo bulegoa inauguratu zuten eguna.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun