Amiantoak eragin kaltegarriak eta "askotan hilgarriak" dituela ohartarazteko asmoz, kanpaina berria abiatu du LAB sindikatuak. Gaur goizean, horren berri eman diete lan erakundeko Bizkaiko 80 bat ordezkariri Perezek eta Cristobalek, Astrabuduako Josu Murueta kultur etxean egindako batzarrean. Hori bera azaldu dute biek UKBERRI.NETi eskainiko elkarrizketan (mp3). Sindikatuko arduradunek azaldu dutenez, produktu hori 2000. urtea baino lehen egin diren etxebizitzetako hainbat tokietan, eraikin publiko gehienetan (eskolak, ospitaleak, dendak, bulegoak…), ur hodietan, makinetan, ibilgailuetan, galdaratan, berogailuetan, isolatzaile moduan leku askotan, erabilia izan da. Eta gainera inongo kontrolik gabe. Dagoeneko debekatuta dagoen arren, gaur egun, oraindik ere, edozein tokian aurkitu daitekeen identifikatu gabeko elementu bat da. "Horren ondorioz langile asko (elektrikariak, iturgintzakoak, mantentze-lanetakoak eta eraikuntzakoak batez ere) zein biztanle asko ere produktu oso arriskutsu honekin kontaktuan egon daitezke, kontaktuan daudela jakin gabe", aipatu dutenez. Hori dela eta, lantoki barruan zein lantokietatik kanpo egingo dute kanpaina.
Detektibe lana
Hala ere, ez dute lan erraza LABekoek. Cristobalek aipatu duenez, "izen gutxi" agertzen dira amiantoa baliatzen duten enpresen erregistroan, RERA izenekoan. Gauzak horrela, kanpainaren lehenengo fasean, lantokiz lantoki egingo dute "detektibe lana", sindikatuko bazkideen bitartez. Enpresa horrek amiantoa erabiltzen duen edo bertan aipatu produktua dagoen, langileei azterketa medikoak egiten zaizkien, gaixorik badagoen, eta horrela bada, horri gaixotasun profesionala daukala aitortzen zaion aztertuko dute, tokian-tokian. Horrela, amiantoaren arriskuen inguruko "irudi egiazkoagoa" eman ahal izango dute eta, bide batez, lantoki bakoitzean zer ekimen egin behar den erabaki.
Kalera begira, jendea amiantoaren arriskuaz ohartaraztea da lehenengo asmoa. Horretaz gain, etxebizitza zein eraikin publikoetan amiantoa dagoen ala ez aztertzera premiatu nahi dituzte administrazio publikoak. "Eusko Jaurlaritzak eta Udalek amianto inbentario bat egiteko gaitasuna daukate edota eraikinetan amiantoaren presentzia derrigorrez begiratzeko arauak egin ditzakete", azaldu dutenez. "Gaur egun, amiantoa beste produktu batzuengatik ordezkatzeko baliabide teknikoak egon badaude", LABeko ordezkarien hitzetan.
LAB sindikatuko Bizkaiko 80 bat ordezkari elkartu dira, gaur eguerdian, Mutualiak Axpeko erriberan (Astrabudua) daukan egoitzaren aurrean, Amiantoa "leku guztietan" dagoela eta horrek "hil" egiten duela salatzeko asmoz. Produktu horrek, arnasten denean, gaixotasun larriak eta hilgarriak eragin ditzake, besteak beste, asbestosia, biriketako minbizia, eztarriko minbizia eta digestio-aparatuko minbizia eta peritoneo eta pleurako mesoteliomak. Hala ere, azken urteotan, Hego Euskal Herrian, "kasu bat bera ere ez dute gaixotasun profesionaltzat hartu", LABeko Metalgintza arloko Lan Osasun arduradun Iban Perezek adierazi duenez. "Hori da gaur agerian utzi nahi duguna: zer nolako papera jokatzen duten mutuek, alde batetik; baina, baita Gizarte Segurantzak ere", gaineratu du. Sindikatu abertzaleko ordezkariak salatu duenez, amiantoak kalteak eragiten duela ez aitortzeaz gain, mutuek eta Gizarte Segurantzak "zailtasun eta oztopoak" jartzen dituzte, gaixotutako langileek kalte ordaina jaso dezaten. "Gertatu izan da, mutuak kasuren bat gaixotasun profesionaltzat hartzea, langilea hilda zegoenean jada", Alberto Cristobal LABeko Metalgintza arduradunak sentitu duenez. Horren inguruan kanpaina berria abiatu dute. Argazkian, LABeko ordezkariek Axpen egindako elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun