Bideko segurtasun ikastaroa emango diete Erandioko 9 eta 12 urte arteko eskola umeei
Aste Santu ostean hasiko dira bideko segurtasun ikastaroak Erandion. Ikasleen errolda egin eta jardueren egutegia egingo da, ikastetxe guztien parte hartzea antolatuz, udal iturriek zehaztu dutenez. Tokiko erakundeak 33.000 euroko inbertsioa egin du bideko segurtasun ikastaroetarako ekipamendutan: hamar bizikleta eta hamar kasko, seinaletarako konoak, zintarriak ibilbidea mugatzeko, semaforo eramangarriak, seinale bertikalak, behegaineko seinaleak, oinezkoentzako pasabideak eta homologatutako atoia, material guztia gordetzeko. Erandioko Udalak etorkizunean bizikleta edo moto gidari izango diren neska-mutilak hezi nahi ditu ekimen horren bitartez, "mugikortasun segurua izan dezaten". Horretaz gain, "kalean benetan aurkitu ahal dituzten egoerek zein ondorio izan ditzaketen" erakutsi nahi dizkiete. Horrela, oinezko, bidaiari zein gidari modura gazteek izaten dituzten trafiko istripuak gutxitu nahi ditu Udalak. Argazkian, bi mutiko bideko segurtasuna lantzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun