Adela Andikoetxeak maiz irabazi du barazkien saria. Gernikan zein beste leku askotan ere. Izan ere, "Bizkaiko ortuen erregina" dela behin baino gehiago esan diote. Guztira 400 sari baino gehiago bildu ditu azken 25 urteotan. Bezero fidelak ere baditu, azokaz azoka bere produktuen bila doazenak. Andikoetxean 1981ean hasi zen nekazaritzan era profesionalean, bere aita hil ostean amak hiru alaben artean lurrak banatu zituenean. Orduan, behar egiten zuen Sopelako lantegia laga eta egun osoko jarduna lurrari eskaini zion, famatua egin duten tomate erraldoiak edota kolore guztietako piperminak, piperrak edo berenjenak eskuratzeko.
Urte batzuk pasatu arte ez zitzaion bururatu azoketara joateko, Algortako San Lorentzokoan probatu zuenera arte. 20 metro koadroko ortuarekin hasi eta egun 1.000 bat metro koadro lan egiten ditu.
Adela Andikoetxea Urdulizko baserritarrak barazkien saria irabazi egin du gaur, urriko azken astelehenean ospatu den Gernikako azokan. Busturialdeko Udalak jakinarazi duenez, 300 saltoki baino gehiago izan dira bertan, euria egin arren batu diren 100.000 lagunei baserrietako eta mahastietako produkturik gozoenak eskaintzen. Andikoetxeak Merkurio plazan batu du saria 13:00ak aldera, BBKko ordezkarien eskutik. Ekitaldiaren bitartean, Abiadura Handiko Trenaren aurkako bi lagun oholtzaren gainean izan dira, EAko Miguel Angel Aranaz alkatea, hainbat zinegotzi eta BBKko kideen atzean "AHT gelditu!" eta "AHTrik ez!" lelopeko ikurrak erakutsiz, aurrean beste 50 bat lagunek kontzentrazioa egin dutela. Protestak alde batera utzita, urduliztarra ez da izan saritutako bakarra. Adibidez, Arabako Asparren udalerriko La Leze markakoek irabazi dute 4.000 euroengatik enkantean saldu den gaztaren saria. Argibide gehiagorako, http://gernika-lumo.hitza.info. Argazkian, barazkien postu bat Algortako San Lorentzo azokan, Andikoetxearentzat lehenengo azoka izan dena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun