Indabada Mundialerako txartelak salgai daude jada

Azaroaren 15ean, larunbata, ospatuko da Algortako Txiki eta Otaegi plazan IX Indabada Mundiala. Eta dagoeneko Algortako Gazte Asanbladak prest dauka egun horretarako egitaraua: babajana herrikoia eguerdiko ordu batetan abiatuko dute, sagardo txotxa, ekitaldia eta aurreskuarekin, gero bazkari herrikoiarekin jarraitzeko. Ondoren, zozketak, kantak eta bestelako jarduerak izango dira, bazkalostea animatzeko. Plaza ganoraz bildu eta atondu ostean, txikiteoaren ordua helduko da, Elektrotxarangak alaituta, eta baita herriz aldatzeko tenorea ere, jaialdiak Getxoko Txorimalo gaztetxean jarraituko baitu, urteroko gaupasa dela medio. Txartelak 6 eurotan daude salgai Amnistia, UK eta La plaza tabernetan eta Eztabaida gunean. "Asko eskertuko genuke aurretik erosiko balira, zenbat jende datorren kalkulatzeko", adierazi du Algortako Gazte Asanbladak (AGA). Bitartean, Indabada antolatzeko, astelehenero, 18:00etan, Txorimalo gaztetxera joatera animatu dituzte neska-mutilak. Argazkian, iaz inoiz baino lagun gehiago batu ziren Indabadan, 600 bat pertsona, ekitaldia Algorta, Getxo eta Berangoko hainbat gazteren atxiloketak salatzeko ekimen bihurtu zela. Argazkiak hemen ikus daitezke.