Plastikozko poltsak desagertzeko kanpaina abiatu dute hainbat taldek
2008ko urr. 28a, 20:06
Ekologistak Martxan elkarteak, Euskadiko Kontsumitzaileen Elkargoak, Osasunaldek eta Alonsotegiko eta Bilboko Errekalde eta Zorrotzako auzo taldeek erabilpen bakarreko plastikozko poltsak desagertzeko kanpaina bat egingo dute, "Euskadi plastikozko poltsa barik" izenburupean, prentsa ohar bidez gaur jakinarazi dutenez. Horrela, administrazio publikoei (udalak eta Jaurlaritza) poltsen mugarik gabeko kontsumoa zerga ekologiko baten bidez arautzea eskatu diete, 0,20 euro kobratuz poltsa bakoitza. Zerga horrekin zaborren gutxipena lortzeko ikerketak eta teknologien garapena bultzatu nahi dute, baita erabilpen bakarreko poltsak komertzioen esparrutik desagerraraztea ere. Halaber, merkataritza guneei eta dendariei plastikozko poltsak ordezkatzea eskatu diete, beste sistema batzuk erabiliz, adibidez oihalezko poltsak, gurditxoak, paperezkoak, saskiak eta abar. Gainera, kontsumitzaileei plastikozko poltsei "ezetz esatea" proposatu diete. Kanpainaren barruan, merkataritza zentro handiekin elkarrizketak egin, udaletan mozioak aurkeztu, webgunean kanpainarekin bat egiteko (pertsonak, taldeak, elkarteak, dendak eta udalak) atxikitzeko orria jarri eta triptikoen banaketa egingo dituzte. Besteak beste, Getxoko Udalak 200.000 plastikozko poltsa banatu zituen apirilean paper, plastiko, brick, lata eta bestelako ontzien banaketa eta birziklapena "hobetzeko" sentsibilizazio kanpainan. Argazkian, Keltse Eiguren tokiko Ingurumen zinegotzia aipatu ekimena aurkezten.Kanpainaren sustatzaileen arabera, "erabili eta bota" kulturaren adierazgarririk nagusiena plastikozko poltsa da, eta dendetan ematen den bezain laster zaborra bilakatzen da. Bere ekoizpenak eta erabili osteko tratamenduak ingurumen arazo handiak sortzen dituzte, eta hori dela eta, "bere desagerpena guztiz beharrezkoa dela pentsatzen dugu". Ekimenak erabilpen bakarreko plastikozko poltsen "gehiegizko erabilpenak ingurunean zein osasunean dituen eragin kaltegarriez" ohartarazi nahi du. Hartara, "herritarrengana, dendariengana, merkataritza guneengana eta herri administrazioengana zuzentzen gara, norberak bere ahalmen, aukeren eta arduren arabera jokatu dezan", gaineratu dute. Aipatu elkarteek adierazi dutenez, poltsa batek oso bizi laburra du, batez beste 12 minutu, eta bera ekoizteko ura, energia eta petrolioa behar dira. Behin hondakina bihurtzen denean ez da degradagarria. Urte hauetan haren kontsumoa %47a igo da, eta famili bakoitzeko 5,4 poltsa erabiltzen da astero.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun