Ostegun honetan, urriak 30, aurtengo Getxoko Aste Koraleko azken saioa izango da, Mikrokosmos Vierzon abesbatza fantziarraren eskutik. Kontzertua Algortako Berreroslearen elizan izango da, 19:30ean, eta sarrera, doakoa. Hala ere, ez ahaztu, azaroaren 11n, San Martin egunean, herriko talde batek eskainiko duela emanaldia, 19:30ean, Algortako San Martin elizan, Koldo Iturbe Kultur zinegotziak aurreratu duenez. Izan ere, Getxoko Aste Korala izen bera duen Algortako auzoko jaietan sortu zen. Elizan bertan egiten ziren musika saioak. Hartara, "garaiko ohitura berreskuratzeko asmoz", Zozoak abesbatzak kantatuko du. Iazko Aste Koralean 1.400 entzule izan ziren, udal iturriek nabarmendu dutenez. Argazkian, bihar arituko den Mikrokosmos Vierzon taldea Bilboko Guggenheim museoko armiarma azpian.
Loic Pierrek 1989an sortutako haur abesbatza batean du bere jatorria Mikrokosmos Vierzonek. Handik gutxira emakumezko abesbatza bihurtu zen eta, lortutako arrakastak bultzatuta, Pierrek taldearen errepertorioa zabaltzea erabaki zuen 1997an eta ahots mistoen abesbatza sortu zuen honako helburu honekin: XX eta XXI. mendeetako "a capella" errepertorio onena aurkitzea, lan berrien konposaketa bultzatuz eta frantziar abesbatza kantuan dinamika berritzaile bat sorraraziz. 2002an hiru sari irabazi zituzten Debrecengo (Hungaria) Bela Bartok lehiaketan, 2004ko maiatzean bi Lehenengo Sari eta Sari Nagusia eskuratu zituzten Florilege Vocal de Toursen (Frantzia). Errepertorio garaikidearen sormenean eta interpretazioan espezializatuta dagoen Frantziako abesbatza bakarra da eta 18 eta 30 urte bitarteko 40 abeslariz osaturik dago, gehienak erdiko eskualdeko kontserbatoriotakoak. Bere diskoen argitalpenek arrakasta handia lortu dute. Horien artean aipatzekoa da “Villarosa” izeneko diskoa, Le Diapason D'Or sari ospetsua lortu zuena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun