Getxoko Udalaren Lan eta Garapen Ekonomikorako Zentroak Datuak Babesteko Lege Organikoari buruzko mintegia antolatu du, udalerriko mikroenpresei zuzenduta. Saioak azaroaren 10ean eta 11ean izango dira, 9:15etik 13:15era, Algortako kultur etxean, Villamonten. Mintegi honen xedea da, modu praktikoan, datuak babesteko arloan indarrean dagoen araudia eta enpresa horretara egokitzeko prozedura ezagutaraztea Getxoko mikroenpresei, udal iturriek zehaztu dutenez. Prestakuntza hori Getxo Adapta LOPD programaren barruan jasota dago (Europako Gizarte Funtsaren Valora egitasmoa). Bestalde, azaroan, paperean zein udal webgunean, Getxoko Enpresa Giden lehenengo zenbakia argitaratuko dute. Horretan, udalerrian informatikako zerbitzuen, enpresetarako aholkularitzaren, zerbitzu juridikoen eta aholkularitzako zerbitzuen jarduerak egiten dituzten enpresak sartuko dira. Argazkian, Getxoko Behargintza.
Getxoko Behargintzak garatutako ekimen horren helburua udalerriko enpresak ezagunagoak egitea da, euren bezero potentzialen artean; baita Lan eta Garapen Ekonomikorako Zentroak sustatuta sortu berri diren enpresak ere, azaldu dutenez. Aurretik aipatutako sektoreetako batean (informatika, aholkularitza, zerbitzu juridikoak edo enpresen aholkularitza) euren jarduera garatzen duten eta gidan agertzeko interesa duten Getxoko enpresa guztiak azaroaren 7ra arte harremanetan jar daitezke Behargintzarekin: Lan eta Garapen Ekonomikorako Zentroa-Behargintza, San Martin kalea 17, Algorta (Getxo). Telefono zenbakia 944 660 140 da eta helbide elektronikoa behargintza[abildua]getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun