Gazteek azaldutakoaren arabera, arratsaldeko 5ak inguruan heldu dira Daduenara etxearen jabe diren senar-emazteak eta beste lagun bat; eta "irainka, mehatxuka eta atean kolpeka" hasi zaizkie. Emakumeak, baina, neska-mutilei egotzi die irainak egin izana. Horrek ekarri ei du okuparen lagunek Ertzaintzari deitzeko erabakia. "Dagoeneko auzibidea zabalik dago, hortaz aukerarik onena hori zela erabaki dugu", gaineratu dute. "Jabeek lehenengo momentutik auzitegira jotzea" eragin du gazteen haserrealdia: "epaitegira joan aurretik arazoa berba eginez konpontzera etorri izan balira...", tamaldu dira. Hala ere, etxeko jabe den emakumearen iritzia bestelakoa da. Bere hitzetan, "hasieran gurekin hitz egitera etorri balira, gauzak bestelakoak izango ziren". "Apaizak eskatuta daukagun beste etxean lo egiten utzi genion behin behartsu bati eta ez zen inolako arazorik egon", aipatu du andreak. Bestalde, "erortzeko arriskuan etxea habetuta" dagoela gaineratu dute jabeek, "horrek dakarren arriskuarekin". Horretaz gain, dagoeneko "eraikina konpontzeko proiektua idatzita" daukate.
Urteak gora eta urteak behera
"Hamar urtez etxea utzita eduki eta gazte bat bertan bizitzera sartu denean, begira nola etorri diren", adierazi dute kontran gazteek. Jabeek, ordea, "orain hiruzpalau urtera arte" etxea "familiarekin parrilladak eta bazkariak egoteko" erabiltzen zutela aipatu du, "komuna jauzi zen arte". Bitartean, gazteak kaleko punta batean eta jabeak bestean zeudela jabeen lagun batek "mehatxuka" hasi zaiela salatu dute neska-mutilek. Gainera, akusatu duten gizonezkoa handik pasatzean ertzainek identifikatu ez dutela eta kexu agertu dira, baita jabea ertzain baten laguna ei delako. Liskarra gora eta behera, gaur epaiketa atzeratu dute eta oraindik ez dakite noiz izango den. Bitartean, Daduena barruan daude oraindik okuparen gauzak eta berak jarritako sarraila berria.
Duela hamar egun inguru sartu zen gazte bat Algortako Karitate kaleko 6. zenbakian dagoen Daduena etxean, bertan bizitzeko. Atzo udaltzainen eskutik zitazioa jaso ostean, gaur egin behar zioten epaiketa azkarra Getxoko Guardia Epaitegian. Baina atzeratu egin dute bista, "defentsa prestatzeko denbora nahikorik ez" duela izan argudiatu duelako mutilak. Gainera, usurpazioa ez omen dago epaiketa azkarren bidez juzgatu daitezkeen delituen artean. Hala ere, dirudienez, etxea ahalik eta lasterren uzteko eskatu dio fiskalak mutilari. Horren arabera hurbildu dira 17:00ak aldera Daduenara jabeak. Batzuk zein besteak irainka hasi zaizkiela adierazi dute. Bitartean, "dagoeneko auzia epaitegian dagoela ikusita eta egin dizkiguten mehatxuak salatzeko", Ertzaintzari deitu diote bertan bizi den okuparen lagunek, mutila etxean ez zegoela. Handik gutxira bertaratu dira Karitate kalean polizia autonomikoaren bi patruila auto eta udaltzain kotxe bat. Urduritasunak tarteko, fiskalak eskatutakoan oinarrituta eta inolako agindu judizialik gabe, okupak etxetik gauzak atera behar zituela adierazi diete horren lagunei ertzainek. Bi horiek eurek eramandakoak atera dituzte bakarrik, bertan bizitzen dagoen gaztearen gauzak eramateko "furgoneta behar izateaz gain, horrek dakielako zehazki etxean zer zegoen lehendik eta berak zer sartu duen". Horretaz gain, "zabalik dagoen auzibidean sartzea saihestu" dute horrela. Bitartean, bikoteak ezin izan dio zehaztu poliziari okupa bere gauzak ateratzera noiz joango den, "oraindik ere lanean dagoelako". Argazkian, ertzain autoa Daduena etxetik gertu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun