Aisialdia euskaraz gozatzeko aukera eskaini nahi du Udagoieneko Osterak, eta hori lortzeko, derrigorra da kalitateko eskaintza erakargarria egitea. “Horrekin batera, eskaintzaren izaera askotarikoa ere bereziki zaindu dugu programazioa osatzeko orduan, eta hori dela eta, gustu eta kultur adierazpide ezberdinak hartu ditugu kontuan”. Halaxe azaldu du Manuel Moreno Topagunearen Kultugintza saileko teknikariak. Bizkaiko Kultura diputatu Josune Ariztondok, berriz, Osteraren programazioaren izaera askotarikoa azpimarratu du. “Euskaraz ere baditugu gustu guztiak asetzeko moduko ikuskizunak, denak ere kalitate handikoak, eta Udagoieneko Osterak argi uzten du hori”, adierazi duenez.
50 artista baino gehiago
Artistentzat ere haien lanak erakusteko primerako aukera da Udagoieneko Ostera. Guztira, hamaika musika eta antzerki talde jarriko ditu dantzan kultur zirkuituak, 50 artista baino gehiago: Xabi eta Fredi Paya, Onintza Enbeita, Uxue Alberdi eta Sustrai Colina bertsolariak Patxi Gallego marrazkilariarekin batera; Iban Garate, Aitziber Garmendia, Ana Elordi, Ane Zabala, Galder Perez, Jon Plazaola, Asier Hormaza, Ainhoa Aierbe eta Aitor Gabilondo aktoreak, Ama Say, Piztiak, Oreka TX eta Su ta Gar, Petti, Zura, Mikel Markez eta Seiren musika taldeak…
Bizkaiko Foru Aldundiaren eta BBKren laguntzaz, Udagoieneko Ostera kultur zirkuituaren bederatzigarren edizioa jarriko du abian larunbat honetan, azaroak 1, Sondikan, Topagunea Euskara Elkarteen Federazioak. Guztira, zortzi emanaldik osatuko dute ekimena, eta haietako bakoitza Bizkaiko herri batean izango da. Hartara, etzi Sondikan hasi eta Muskiz, Bilbo, Durango, Balmaseda, Basauri eta Bermeo bermeo bisitatu ostean, Leioan izango du bukaera Udagoieneko Osterak, abenduaren 5ean. Ostiral horretan, Joseba Apaulazak zuzendutako "Hor al zaude?" antzezlana taularatuko dute, 20:00etan (6 euro), Kultur Leioan, aktoreetako bat Asier Hormaza algortarra dela. Bestalde, Xabi eta Fredi Paya bertsolari algortarrek etziko "Bertsotramarraskya" izeneko ikuskizunean parte hartuko dute, Sondikako kultur etxean, 20:00etatik aurrera (6 euro). Xabi Paya Bizkaiko txapeldunak eginiko traman oinarrituta, bere anaia Fredi, Onintza Enbeita, Uxue Alberdi eta Sustrai Colina bertsolariek eta Patxi Gallego komikilariak batera jardungo dute saioan. Bestalde, azaroaren 7an, Muskizko Meatzari aretoan izango den "Komeriaren Kluba" saioan Xabi Paya bera izango da aurkezlea. Argazkian, ezkerretik eskuinera, Jon Ugalde (BBK Fundazioa), Jasone Mendizabal (Topagunea), Miren Dobaran (Bizkaiko Foru Aldundiko Euskara zuzendaria, berangoztarra bera) eta Manuel Moreno (Topagunea) goizeko prentsaurrekoan / Topagunea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun