Eduardo Camino kubatarraren argazki erakusketa estreinatuko du bihar Getxoko EBk
2008ko urr. 30a, 22:04
Getxoko Ezker Batuak bihar emango dio hasiera Eduardo Camino artista kubatarraren "Momentos" argazki erakusketari. Hitzordua EBk Algortan duen egoitzan, Salsidu kaleko 7 zenbakian izango da, arratsaldeko 8etatik aurrera. Erakusketak ikusgai dauden bitartean, Caminoren lanez gozatu ahal izango da. Eduardo Camino Kuban jaio eta bizi zen 2002ra arte. Urte horretan emigratu zuen eta Espainian hainbat urte eman ondoren Euskal Herrira etorri eta 2005ean Erandion finkatu zen. Handik hona hainbat erakusketetan eta txapelketetan parte hartu du, iaz Erandioko Udalak antolatutako argazkilaritza lehiaketaren saria jaso zuela. Azken argazki erakusketa Astrabuduan kokatu zuen Caminok, pasa den irailean. Irudian, iaz Portugaleteko Andra Mariaren egunean Caminok ateratako argazkietariko bat / © Eduardo Camino.Bederatzi urte zituenetik, zenbait kirol diziplina praktikatu ditu Caminok. Ume-umea zenetik gustatzen zaio animaliak euren inguru naturalean ikustea, eta, beraz, 10 urte zituela, izekok Reflex Zenit E kamera errusiarra oparitu zion. Kamerak pisu handia zuen arren, Eduardo arratsaldero joaten zen mendira hura hartuta, animalia, erreka, palmondo eta abarren argazkiak egitera. 12 urterekin, Marianao udalerrian, bertako gazte talde batean sartu zen, eta, denen artean, argazki elkarte bat osatu zuten herriko kultur etxean. Lehen Mailako Maisu izateko karrera amaitzean, 1978an, berriz ere ekin zion argazkigintzari, eta zenbait lehiaketatan hartu zuen parte, Habanako Probintzian (Landa Ingurua). Han, lehenengo sari gisa, Zenit 12 kamera bat lortu zuen, eta, era berean, bi aipamen ere eskuratu zituen beste lehiaketa batzuetan. Gaur egun Erandion bizi da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun