Ertzaintzak 20 urteko A.F.B., 21 urteko G.N.M. eta 23 urteko I.I.S. gizonezkoak atxilotu ditu azken orduotan, urriaren 19an, Leioan indarkeria erabiliz egindako lapurreta batean parte hartu zutelakoan. Lapurretaren biktimak jipoi ederra jaso zuen eta eragindako lesioengatik osasun zentro batera eraman behar izan zuten. Polizia iturrien arabera, gertakaria ezagutu ostean, polizia autonomikoak lapurrak identifikatu eta atxilotzeko beharrezko ikerketak jarri zituen martxan. Ikerketa hauek, 20 urteko A.F.B. mutilaren atxiloketa ekarri zuten, joan den asteazkenean. Ordu batzuk beranduago, atzoko egunean zehar, beste bi susmagarri (gizonezkoak biak) atxilotu zituzten: G.N.M. eta I.I.S. Momentuz, kasu honen ikerketak zabalik mantentzen ditu Ertzaintzak eta ez du baztertzen ondorengo orduetan atxiloketa gehiago eman daitezkeenik.
Joan den astean gizonezko bat polizia egoitza batera joan zen indarkeria erabiliz lapurreta egin ziotela salatzeko. Lapurreta urriaren 19an, arratsaldez, izan omen zen Leioako Udondo auzoan. Gizonezkoa, arratsalde hartan, aipatu auzoko kale batean zegoen hainbat lagunekin batera. Orduan, beste lagun talde bat hurbildu zitzaien gainean beisboleko bateak, kateak eta katana bat zeramatzatela, Eusko Jaurlaritzaren Herrizaingo Sailak zabaldutako bertsioaren arabera. Segidan, salatzaileari eta bere lagunei mehatxuka eta erasoka hasi zitzaizkien. Salatzaileak kontatu ei zuenez, bere lagunek (kolpatuta bazeuden ere) alde egitea lortu zuten, baina erasotzaileek bera geldiarazi eta jipoi ederra eman zioten. Gainera, lurrean botata zegoela, kate bat, bi eraztun, belarritakoak eta gainean zeramatzan beste hainbat gauza kendu omen zizkioten.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.