Laugarrenez antolatu dute Punta Galea Big Challenge txapelketa. Horrenbestez, larunbat honetan, azaroak 1, hasiko da itsasoari begirako itxaronaldia: baldintza oso zorrotzak behar dituen ekitaldia denez, apirilaren 1era arte (150 egun) jarri dute epemuga antolatzaileek. Itsasoaren baldintzen arabera, denbora tarte luze horren baitan aukeratzen den egunean, gutxienez lau metroko olatuen gainean ibili beharko dute aurretik gonbidatutako 18 surflarik. Bi ekitaldi arrakastatsuren ostean, hirugarren edizioa ezin izan zuten egin baldintza nahikorik ez zegoelako. BIgarren eta azken horretan Jaime Fernandez izan zen txapelduna, baina proba honetatik dagoeneko Eneko Acero, David Bustamante, Ibon Amatriain, Pablo Solar, Asier Muniain edo Iker Fuentes igaro dira, besteak beste. Argazkian, txapelketaren aurreko edizio batetako irudi ikusgarria.
Lehiaketa honen formatoa ere berezia da; txapelketa 3 edo 4 ordu besterik ez du irauten, bertan surflari bakoitzak erabakitzen du noiz sartu. Epaileek hainbat maila bereiztuko dituzte eta horren arabera hurrengoak sarituko dituzte: olaturik handiena, surflaririk osoena, jaitsierarik bortitzena eta "wipe out" handiena. Oraingo honetan 8.000 euro banatuko dituzte saritan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun