Mikel Saratxo gazte algortarra etxean da dagoeneko. Amnistiaren Aldeko Mugimenduak Etengabe bitakoraren bidez jakinarazi duenez, Saratxo goizeko 05:00ak aldera iritsi da Algortara, eta lagun, senide eta auzokide ugarik "harrera beroa" egin diote. Iturri beraren arabera, Saratxo "azken orduan" kaleratu zuten Madrilgo (Espainia) Alcala-Mecoko espetxetik. Handik herriraino berak deitu eta bere bila joandako etxeko eta lagunekin autoz bidaiatu zuen. Saratxo kaleratuko zutela atzo bertan jakinarazi zuten Etxeraten kontzentrazioan, agente judiziala "bere kontra irekitako prozeduretan libre utzi eta dokumentuak sinatzeko" joan zitzaiola jakinarazi baitzien presoak senideei. Dena den, aukera hori herritik bolo-bolo ibili da azken asteotan. Azkenean, fidantzarik gabe askatu badute ere Fiskaltzak gaztearen aurkako kargu guztiak mantentzen ditu eta astero sinatu behar du. Argazkian, Saratxoren eta beste hiru gazteen atxiloketak salatzeko Getxoko paelletan egindako mobilizazioa.
Mikel Saratxo uztailaren 22an atxilotu zuten. Egun berean, Aitor Kotano, Arkaitz Goikoetxea eta Iñigo Gutierrez algortarrak eta beste 5 lagun ere atzeman zituen Guardia Zibilak Bilbon, Algortan, Elorrion, Galizian eta Malagan egindako operazioan, ETAko Bizkaia komandoko kide edo laguntzaile izatea leporatuta. Bi egun geroago Inge Urrutia algortarra harrapatu zuten eta handik hiru egunera aske utzi, Adur Aristegi eta Libe Agirre elorriotarrekin batera, 12.000 euroko fidantza ordaintzeko baldintzapean. Guztiek torturak salatu zituzten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun