"Azaro erdialdean" hitz egingo dute uriolak saihesteko presazko neurriez
2008ko aza. 4a, 19:31
Getxoko PPk gaur egindako eskaerari erantzunez, Uholdeetako Batzorde Berezia "hilabetearen erdian" batzartuko dela aurreratu dute, prentsa ohar bidez, udal iturriek. Hala ere, data zehatzik ez dute eman. "Batzordeak berak Uraren Euskal Agentziari ibaiaren arazoari aurre egiteko proposatu dizkion berehalako irtenbideen eta Gobela ibaia egokitzeko egitasmoaren aurreko jarrera hartzeko" egingo dute bilera hori, tokiko agintarien arabera. Era berean, "uholdeetatik hona burututako ikerketa teknikoen emaitzak ikusita, estolderia eta saneamendu sareetarako proposatutako irtenbideak" ere aztertuko ditu Batzorde Bereziak. Atzokoan uriolak saihesteko presazko neurriak hartzea eskatu zuen berriro Getxoko PPk. Izan ere, euri jasa gogorrek ezinegona eragin zuten Gobela inguruko bizilagunen artean. Autoak garajeetatik ateratzen eta ura etxera sartuko zitzaien beldur eman zuten igandeko gaua. Argazkian, hauxe zen atzo goizean Gobela Ibaiak zuen itxura / Arantxa Gutierrez.Uholdeek kaltetutako bizilagunen elkarteekin "etengabeko harremanetan" daudela adierazi du Joseba Arregi Hirigintza zinegotziak: “Udala egiten ari den lanaren berri dute eta jakin badakite irtenbide teknikoek, bai behin-behinekoek, bai behin betikoek, bere denbora behar dutela eta denok horixe ahalik eta laburrena izateko presionatzen ari gara”, azaldu duenez. “Denborak PP benetan kezkatzen badu (Uholdeetako Batzordea berehala biltzeko egindako eskariari lotuta) zergatik ez dute uztailean eman zitzaien proiektuaren gaineko jarrera agertzen?”, kritikatu du Arregik. Zinegotziak aipatu du popularrek ez dutela uztailean aurkeztutako URA agentziaren egitasmoaren gaineko "inolako jarrerarik" agertu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun