Etxebizitza beharraren kontuta "itxurak egitea" egotzi dio Leioako Udalari Ezker Abertzaleak
EAJk eta EB-Aralarrek osatzen duten udal gobernuak babes ofizialeko 1.000 etxebizitza eraikiko dituela iragartzeak "marketin eta itxurakeriatzat" jo du Leioako Ezker Abertzaleak. "Egin nahi dituzten txaleten kopurua isiltzeaz" gain, "eraiki daitezkeen BOEtatik legeak ezartzen duen gutxienekoa" altxatu nahi izatea egotzi diote Eneko Arruebarrena alkateak zuzentzen duen gobernu taldeari. Ezker Abertzaleko kideek "are larriagotzat" jo dute, "etxebizitza beharrari buruzko azterketa argi bat egin gabe eraiki nahi izateaz gain", hutsik dauden 1.376 etxebizitzekin (Gaindegiaren datuak, 2002) "inolako proposamenik ez" egitea. Hori dela eta, Leioan etxebizitza publikoaren gaineko plan bat eratzea, batez ere alokairu sozialekoak, "beharrezkoa" deritzote. Argazkian, Leioako Ezker Abertzalea prentsaurreko bat ematen / Gaztesarea.
Etxebizitzaren arazoa konpontzeko "leioaztarren aurrean ahaleginak egiten dituztenaren itxura egitea" leporatu dio Leioako Udalari Ezker Abertzaleak. Adibideak jarrita, "Ondizko lurren %100 BOEak egiteko gordeta zegoen, baina plana aldatu dute salmenta libreko etxeak eraiki ahal izateko. Gainera, Hiri-antolamendurako Plan Nagusiaren baitako (HAPN) aldaketak azken bi osoko bilkuretan egin dituzte, irailaren 20a baino lehen gauzatzeko. Zertarako? Lurzoruaren Lege berria aplikatu behar ez izateko, eta ondorioz, eraiki beharreko etxebizitzen artean %65 BOE bakarrik egiteko, %75 beharrean (irailaren 20aren osteko legeak ezartzen duen gutxienekoa)", azaldu dute ezker abertzalekoek. Horretaz gain, hirigintza-politika "leioaztarrei baino, enpresa eraikitzaileei mesede egiteko diseinatu" izana egotzi diote Arruenbarrenaren udal gobernuari. "Politika hedagarria da eta ez da jasangarria (lurzorua alferrik galduko da txaletak egitean). Leioan 1.500 etxe eraikitzean lurzoruaren zati handi bat hipotekatuko dute, eta zoritxarrez, ez dute konponduko etxebizitzaren arazoa, ez baitute bermatuko leioaztar guztientzako sarbidea etxeotara. Oinarrizko eskubide bat ez lukete zozkatu behar, bermatu beharko lukete", Leioako Ezker Abertzalearen arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun