Hastear dagoen hauteskunde kanpainaren aurrean, egindako hausnarketa plazaratu zuen atzo Euskal Herrirako Unibertsitatea: Gure Helmuga plataformak. Taldea EHUko Errektoretzarako aurreko hauteskundeen aurrean sortu zen bi ideien inguruan: lehena, "une honetan non Unibertsitate guztiak aldaketa sakonak bizitzen ari diren, nolako unibertsitatea egin behar dugunaren inguruko eztabaida lehenesten genuela", eta bigarrena, "ildo horretan bestelako unibertsitatea posible zela eta horren ezaugarri batzuk aurreratzen genituen", emandako prentsaurrekoan Amaia Andrieuk azaldu zuenez. Dinamika horren harira, 300 bat irakasle eta AZPko langilek bat egin zuten manifestuarekin eta euren mezua unibertsitarioen artean zabaldu zuten. Oraingo honetan, EHUko Errektoretzarako hauteskunde berrien aurrean, "eztabaida bultzatzearekin konprometituta" jarraitzen dute plataformako sustatzaileek. "Gainera, orain, dirudienez, bi proiektu aurkeztuko direnean, askoz garrantzitsuagoa ikusten dugu kudeaketara baina haratago doan unibertsitate ereduaren inguruko eztabaida bultzatzea", Andrieuk azaldu zuenez.
Batzar informatiboak, foroak...
Ildo horretan, euren manifestua helarazi eta beraiekin biltzeko eskaera luzatuko diete hautagaiei, ziurtatu zutenez. Bestetik, campus ezberdinetan batzar informatiboak konbokatu eta foro ezberdinetan euren mezua zabaltzen hartuko dute parte. Izan ere, maiatzean bezala, plataformak ez du abendurako hautagairik aurkeztu, "baldintzak berberak direlako". Euren ustez, hautagaia doktorea izan behar izatea "baztertzailea" da, "horrek gauzak hobeto egingo direla ez duelako inondik inora bermatzen". 2004ko bozetan hautagai izandako Iñaki Antiguedadek ere plataformak abenduaren 4rako ordezkaririk aurkeztu ez izana defendatu zuen, "asmoa unibertsitatea beste oinarri batzuetatik planteatzeko baldintzak sortzea izanik, hobe delako lehia hutsetik kanpo egotea". "Guk ez genuen plataforma hau sortu hautagai baten edo bestearen lobby bezala aritzeko, baina aurreko hauteskundeetan gertatu zen bezala argi daukagu hauteskundeetan jokoan dagoena da bultzatu nahi den unibertsitate eredua", plataformakideen azaldu zutenez. Ildo horretan, kanpaina hautagaien programak, errektoretza taldeak eta diskurtsoak ikusteko eta aztertzeko auketzat hartu dute.
EHUko hauteskundeei begira unibertsitate eredu ezberdinen inguruko eztabaida egitea eskatu dute
2008ko aza. 6a, 10:53
Maiatzaren 22ko EHUko Errektoretzarako hauteskundeetan egin bezala, abenduaren 4ra begira, "bestelako unibertsitatea posiblea" dela aldarrikatu du 300 bat irakasle eta administrazio eta zerbitzuetako langileen (AZP) babesa daukan Euskal Herrirako Unibertsitatea: Gure Helmuga plataformak. "Euskara lehenengo mailako hizkuntza izatea bermatuko duena, Euskal Herriko unibertsitateen arteko sarea sortzea bultzatuko duena, dagozkigun eskubide guztien aldeko eragilea izango dena, eta hauxe guztia, horrelako unibertsitate ereduan: titulu eskaintza zabala eta irekiarekin, oinarrizko ikerkuntza zientifikoa indartuko duena, genero berdintasunerako neurriak aktibatuko dituena eta lankidetza eta garapen orekatuan oinarrituko dena", atzo emandako prentsaurrekoan adierazi zutenez. Horretarako, "demokrazia partehartzailearen aldeko urratsak emango dituen unibertsitatea" gura dute, "finantziazio publiko nahikoa izanik eta unibertsitateko langileen lan baldintza duinak bermatuko dituena". Gauzak horrela, unibertsitateko sektore guztien (irakasleak, AZP eta ikasleak) artean, bakoitzak defendatzen duen unibertsitate ereduaren inguruko eztabaida egiteko proposamena jarri dute mahai gainean berriro. Argazkian, Iñaki Alegria, Mila Amurrio, Amaia Andrieu, Iñaki Antiguedad, Luis Mari Elizalde, Deiñe Larrabeiti, Iñaki Larrañaga, Cesar Martinez, Txoli Mateos, Arantza Urkaregi eta Gorka Zabala, atzoko prentsaurrekoan.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun