Astelehenetik aurrera Saharako emakumeei buruzko erakusketa egongo da ikusgai Itzubaltzetan
2008ko aza. 6a, 13:10
Azaroaren 10etik 15era bitartean, "Emakume izena du Saharak" lelopeko erakusketa egongo da ikusgai Itzubaltzeta / Romoko udal erakusketa aretoan. Bertan, Marisol Ramirez kazetari grafikoak eta Teresa Burgui Mundubat gobernuz kanpoko erakundeko kideak, 2007ko irailaren 1etik 8ra bitartean, Saharako errefuxiatuak bizi diren Tinduf-eko (Aljeria) kanpamenduetara egindako bidaian jasotakoa ikus daiteke. Argazkien bitartez bertan bizitakoaren kontakizuna eskaintzen dute Ramirez eta Burguik, batez ere emakumeen bizimoduari arreta berezia eskainiaz. Saharar herriak 32 urte daramatza basamortuan, bere lurrera, Mendebaldeko Saharara, noiz itzuliko zain. Ekimenaren helburua kanpalekuetako emakumeen bizimoduaren berri ematea, udal iturriek adierazi dutenez. Erakusketa 11:00etatik 13:00etara eta 18:00etatik 21:00etara egongo da zabalik astegunetan eta, goizez bakarrik, larunbatean.Marisol Ramirezek eta Teresa Burguik Saharan bizitakoa azaltzen dute erakusketaren bidez, eta basamortuko lurralde horretan aurkitutako pertsonei buruz hitz egiten digute. Aljeriarrek, gainera, ez zuten inoiz pentsatu inguru horretan inork bizirik iraun zezakeenik, adierazi dutenez. Besteak beste, Smara-ko emakumeek familian jaiotako neska-mutikoen izena aukeratzeko egiten duten zeremonia berezia ikus daiteke argazkietan. Era berean, Emakumeen Etxean ere egon ziren. Bestalde, "Otsailak 27" wilayan, emakumeak prestatzeko tailerak nolakoak diren eta nola antolatzen diren ere ikusi zuten. Azkenik, Aaiunen, ikasleak agurtzeko ekitaldi politikoaren lekuko izan ziren. "Kanpalekuetan familiarekin uda igaro ondoren, Aljeriara eta beste hiri batzuetara itzultzen dira ikasten jarraitzeko", azaldun dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun