Orain gutxi Pinuetako kultur areto berria zabaldu zuen Leioako Udalak. Oraingoan, berriz, erdigunean, Aldapabarrena kaleko 2-4 eta 6 zenbakien artean, Gaztelekua egiteko asmoa dauka tokiko erakundeak. Aurreratu dutenez, hilabete gutxi batzuk barru irekita egongo da, dagoeneko Udalak egokitze lanak agindu baititu. Proiektuaren ezaugarriak idazteko Arcain Ingenieria y Arquitectura enpresa aukeratu dute eta aurrekontua 663.439 eurotakoa da. Gazteei zuzendutako aretoak 517 metro koadro izango ditu, hainbat gunetan banatua: 50 lagunentzako ikasketa gela, erabilera anitzeko aretoa, nagusienak egoteko gela eta txikientzako beste bat ere, informatika gunea, elkarteentzako bulegoa, administrazio gunea, sukaldea eta honi elkartutako gela bat, eta azkenik komunak eta artxiboak. Argazkian, hainbat neska-mutil Berangoko gaztelekuan.
Gaztelekuaren banaketa egiterakoan gauza bat izan da kontuan: ekintza zaratatsuak eta lasaiagoak egiten diren guneak banatzea, tokiko arduradunek azaldu dutenez. Horretaz gain, aretoa zatika irekiko dute, erabilera eta ordutegien arabera. Zehazki, gune “zaratatsua” da, hau da, erabilera anitzeko, elkarteen bilerak egiteko eta nagusientzako gelak, besteetatik bereiziak egongo dira. "Proiektu honetan esfortzu berezia egin da isolamendu akustikoari dagokionez, lokalaren goiko aldean bizi diren leioaztarrei eragozpenik ez sortzeko", adierazi dute Udaletik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun