Tasa eta zergetan %4,5 gehiago ez ezik, lehendabiziko aldiz estolderiagatik ere ordaindu beharko dute berangoztarrek
2008ko aza. 10a, 10:31
2009ra begira, tasak eta zergak %4,5 igotzea erabaki berri du Berangoko Udalbatzak, EAJ, EA eta Ezker Batuaren aldeko botoekin. Halaber, alargun, jubilatu eta baliabide urriak dituzten familientzat hainbat hobari ere onartu dituzte. Udal arduradunen ahotik "Deia" egunkariak atzo argitaratutakoaren arabera, "berrikusketa lan nabaria egitea suposatzen du igoera horrek, biztanle kopuru berdina duten udalerriekin konparatuz presio fiskal txikiagoa duen udalerria delako Berango. Azken lau urteotan ez da ia aldaketarik egon, ordutik hona KPI %14,6 igo den arren. Portzentai hori kontuan hartuta, askoz arinagoa da aplikatutako igoera". Iturri berberek diotenez, %5 gehiago ordaindu beharko da zamara bilketagatik, "zerbitzu horren kostuaren %60 ordaintzea bermatuz". Bestalde, 2009an estolderia tasa kobratzen hastearekin ados egon ziren EA eta EB. Inoiz ez dute horrelakorik ordaindu Berangoztarrek. Argazkian, Maria Isabel Landa alkatea Nagusien Etxera egindako bisitan.Bitartean, Berangoko alargun, jubilatu eta baliabide urriak dituzten familiek %15eko deskontua izango dute Ondasun Higiezinen gaineko Zerga (OHZ), ibilgailuen gainekoa, ura, zarama bilketa eta estolderia tasa ordaintzerako orduan. Eta indarrean jarraituko dute familia ugarientzako hobariak. Bitartean, OHZren erdia baino ez dute pagatu behar izango etxe bat hutsik izan eta, alokairurako, Eusko Jaurlaritzari uzten diotenek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun