Balaztatze elektrikoan, motorrek beste aldera egiten dute bira, eta generadore bihurtzen dira, trenaren energia zinetikoa energia elektriko bihurtzen dutenez gero. Balaztatzean sortzen den energia elektrikoa katenariara birbideratzen da eta handik arrankatu edo azeleratuko duen hurrengo trenera bideratuko da. Sistema horrek trenen artean kilometroa edo gutxiago dagoenean funtzionatzen du. Metro Bilbaoren kasuan egingarria da trenak enborreko trenbidean 2,5 minututik behineko maiztasunez ibiltzen direnez gero. Funtzionatzeko oinarrizko eskema horri esker balaztatzeetan ateratzen den energia partzialki berreskuratzen da eta, horrela, gainerako trenek energia horren portzentaje handiago ala txikiagoak berreskuratzen dituzte, balaztatzen ari den trena zenbat distantziara dagoen arabera.
Energia aurrezpena
Metro Bilbaoren trenak eta instalazioak energia elektrikoarekin aritzen dira. "Ingurumenean eragina ahalik eta txikiena izan dadin eta energia ahalik eta gehien aurrezteko funtsezkoa da ahalik eta egokien kontsumitzea lortzea", garraio enpresako arduradunen hitzetan. Eman dituzten datuen arabera, 2007an guztira 69.977.054 kwh kontsumitu zituzten, gutxi gorabehera, eta horien guztien %67 edo trenen trakzioak eroan du. Subestazio elektrikoek katenariaren bidez ematen diete indarra trenei. Energia motorretara heltzen da (bogietan daude motorrak), trenak arrankatu eta mugitzeko.
Metro Bilbaok trenetako energia berreskuratzeko duen sistema jarriko du ikusgai
Metro Bilbaok bat egin gura izan du Innobasque berrikuntzaren euskal agentziak antolatzen duen Zientziaren Astearekin, trenetako energia elektrikoa berreskuratzeko bere egitasmoaren berri emanez. Bilboko Arriaga plazako karpapean, elektrizitatearen kontsumoa eraginkorrago bihurtzea helburu duen sistema ikusgai egongo da, azaroaren 16ra bitartean, 10:00etatik 22:00etara (igandean 13:00ak arte bakarrik), garraio enpresako arduradunek jakinarazi dutenez. "Trenaren motorrek energia kontsumitzen eta ematen dute. Trakzioan kontsumitzen dute, gurpilak mugitzean, eta balaztatzean ematen dute, energia katenariara itzuliz, inguruan dauden trenek aprobetxatzeko; horrela energia aurrezten da, %33 inguru", azaldu du Metro Bilbaok. Argazkian, metro geltoki bat bidaiariz gainezka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun