Datozen Gabonetan hainbat aisialdi ekintzatan parte hartzeko aukera izango dute haur eta gaztetxoek Plentzian. Besteak beste, abenduaren 29rako, astelehena, Sopuerta Abentura parkera txangoa antolatu du bertoko Kultur Etxeak. Goizeko 9:30ean aterako dira herritik, 14:00etan etxera bueltatzeko. Izena ematen duten neska-mutil guztiekin bi talde osatuko dituzte: bata 5 eta 7 urte bitarteko umeekin; eta bestea 8 eta 10 urte artekoekin. Horrenbestez, plentziarrek 15 euro ordaindu beharko dituzte eta bost euro gehiago kanpokoek. Bitartean, urtarrilaren 5ean eta 7an, kometa tailerra egingo dute Goñi Portal kultur aretoan, 10:00etatik 13:00etara, 8 eta 12 urte bitarteko haurrei zuzenduta. Ikastaroa 10 eurotan aterako zaie udalerrian erroldatuei eta 12 euro gainontzekoei. Aipatu bi ekintzetarako, azaroaren 17ra arte dago izena emateko aukera. Argazkian, bi ume zuhaitzetatik zintzilik, Sopuerta Abentura parkean.
Hala ere, aurretik hainbat ekitaldi izango dira, abenduaren 15ean hasita. Zehazki, egun horretarako, Gabon kontu ikuskizuna prestatu dute, Deabru Beltzak taldearen eskutik. Saioa 18:00etan izango da Goñi Portalen, sarrera doan. Hilaren 23an, Ines Formigalen ipuinak entzuteko aukera edukiko dute 4 eta 9 urte arteko neska-mutilek, 11:00etatik aurrera, kultur aretoan. Azkenik, abenduaren 30ean, Barakaldoko BECeko Gabonetako Umeen Parkera joango dira, Plentziatik 9:30ean abiatuta (buelta 19:30ean). Hartara, hilaren 9ra arte egongo da zabalik izena emateko epea, 1997 eta 2002 urteen artean jaiotako haurrentzat. Horietatik 15 euro ordaindu beharko dituzte plentziarrek eta 17 euro gainontzekoek. Batean zein bestean parte hartzeko, Goñi Portalen (Kale Barria, 2) eman beharko da izena. Dena den, antolatutako ekintzen inguruan informazio gehiago eskuratu nahi duenak 946 775 541 telefono zenbakira deitu edo kultura.plentzia[abildua]bizkaia.org e-posta helbidera idatz dezake.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun