Munduko Musikak zikloarekin jarraituz, ostiral honetan, azaroak 14, Arto Tunçboyaciyan armeniarraren doinuak entzungai egongo dira, Kultur Leioan, 21:00etatik aurrera. Armenian Navy Banden liderraren bakarkako lanek Anatoliako eta Armeniako sustraiko musika aztertzen dute, sorkuntzarako eragin berriekin eta bizitzari ilusioz begiratuta. Ospetsua da folk avant-gardearen eszenan, eta Europako artisten 200 disko baino gehiagotan hartu du parte –artista horien artean, World Music delakoaren izenik ospetsuenetako batzuk daude: esate baterako, Sezen Aksu turkiarra eta Eleftheria Arvanitáki greziarra–, eta, AEBetan, jazzaren figura handi askorekin kolaboratu du; esate baterako, Chet Baker, Al Di Meola edo Joe Zawinulekin. 2007tik, mundu osoko musikariak hartzen dituen “Continental Breakfast” proiektuan sartuta dago. Emanaldirako sarrera 12 eurotan egongo da. Hilaren 28an, berriz, Mafalda Arnauth musikari portugaldarrak eskainiko du saioa, toki eta ordu berean. Argazkian, Arto Tunçboyaciyan.
Duen ahots gaztearen freskotasunarekin, hasieran naturaltasunagatik liluratu zituen musikazaleak Mafalda Arnauthek; gero, Portugaleko memoria kolektiboa antzinako arrakasten bilduma baten bidez azaleratzeagatik; eta, azkenik, bere izaeragatik, egin dituen konposizioengatik eta duen nortasunagatik. Mafalda fadoaren bitartez agertzen zaigu, eta errepertorioa zabaltzeko beharra dauka, aletxoa emanez bere herrialdeko kulturari. Kontinente bakoitzean marka bat uzten du: inspirazioa ekarri zion iraganekoa, bizi duen orainaldikoa, eta lortu nahi duen etorkizunekoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun