Krisialdi ekonomikoari aurre egiteko neurrien artean, Jose Luis Rodriguez Zapatero Espainiako Gobernuko presidenteak PSOEren izenean Espainiako aurrekontu guztiak –estatu mailakoak, autonomikoak, foru-aurrekontuak eta udalerrietakoak– babesteko konpromisoa hartu zuen orain aste batzuk. Beranduago, PSOEtik "Eusko Abertzale Ekintzaren udalerrietako aurrekontuak izan ezik" zehaztu zuten. Hasieran, Getxoko PSE-EEk erraztasun handiegirik emango ez zuela zirudien arren, gaurko prentsaurrekoan entzundakoaren harira pentsatu daiteke 2009rako udal aurrekontuak hurbilago daudela. Hala ere, proposamen zehatzak jarri ditu mahai gainean Almansak, nahiz eta EAJk horiei kasu egin ala ez PSE-EEren botoa baiezkotik abstentziora baino ez lukeen aldatuko.
Zorpetzearen alde
Udal ekintza planari dagokionez, besteak beste, etxebizitza publikoak eraikitzeari lehentasuna ematea eskatu du Almansak; horrela, alokairupeko, babestutako edota txandakako apartamentuak sustatuz, gazteen artean. Horretarako, Udalaren ardurapeko enpresa eratzea komenigarria litzatekeen aztertzea proposatu du. Horri lotuta, Hirigintza Antolamendurako Plan Orokorraren (HAPO) berrazterketa arintzea eskatu du Getxoko PSE-EEren bozeramaileak. Bestalde, berriro ere jarri du mahai gainean Algortako Portu Zaharreko orubean aquarium-museoa eta musika eta kultur ekitaldietarako eraikina egitea; baita Areetako Xake plaza eta Itzubaltzeta / Romo berrantolatzeko proiektuak ere. Horiek guztiak ordaintzeko "zorpetzearen alde" agertu da Almansa, baita Eusko Jaurlaritzarekin eta Bizkaiko Foru Aldundiarekin elkarlanean aritzeko ere.
Getxoko aurrekontuak aurrera ateratzeko "erraztasunak" emango dizkio EAJri PSE-EEk
EAJk udal aurrekontuen gaineko proposamena egitekotan, horiek aurrera ateratzeko "erraztasunak" emango dituela jakinarazi du gaur Getxoko PSE-EEk. Lehenik eta behin, "gehiago itxaron gabe", zirriborroa aurkezteko eskatu dio Imanol Landa alkate jelkideari Luis Almansa alderdi konstituzionaleko bozeramaileak, horren gainean eztabaidatu ahal izateko. Izan ere, "krisialdiaren ondorioei aurre egin eta EAJk Udalean eragin duen ez aurrera ez atzerako egoerarekin amaitzeko" aurrekontuak gura ditu PSE-EEk, eta bide batez, "Zarraoaren garaiko aurrekontu luzatuekin amaitu". Ildo horretan, "ahulenei babesa ematea" eta etxebizitza publikoa, merkataritza eta enpregua sustatzea helburu izango dituen udal ekintza plana osatzea proposatu die gainontzeko alderdiei eta bereziki jelkideei Almansak. Konstituzionalisten proposamenen aurrean Tokiko Gobernu Taldeak agertzen duen jarreraren arabera, 2009ko aurrekontuen alde bozkatu edo abstentziora joko luke PSE-EEk. Azken kasu horretan Iñaki Urkizaren (Ezker Batua) baiezkoa nahikoa litzateke udal kontuak aurrera ateratzeko. Argazkian, Luis Almansa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun