Kameratoia izena hartuko du aurten Topagunearen Ikus-entzunezkoen Rallyak
2008ko aza. 12a, 13:59
Azken hiru urteotan egin duen bezala, aurten ere Euskal Herriko Ikus-entzunezkoen Rallya antolatu du Topagunea Euskara Elkarteen Federazioak. Bideo-lehiaketaren laugarren edizioa abenduaren 13an izango da, Donostian, Tabakaleraren instalazioetan. Sortu zen unetik bertatik oso harrera ona izan du Ikus-entzunezkoen Rallyak, Topaguneko arduradunek diotenez. Hori dela-eta, "denbora honetan berez hartzen joan den izaera azpimarratzeko", izen propioa ere hartuko du aurten: Kameratoia. "Izenak oso ondo islatzen ditu ekimenaren ezaugarriak: alde batetik kamera dago, azken finean bideo-lehiaketa baita; eta bestetik, maratoia, lehiaketa horixe izaten baita bertan parte hartzen dutenentzat", azaldu dutenez. Izan ere, hamar orduko epea ematen zaie parte hartzaileei, goizeko 9etatik arratsaldeko 7ak arte, egunean bertan ezagutuko duten gaia eta euren lanetan derrigorrez agertu behar diren zenbait ezaugarri emanda, hiru minutuko bideo baten istorioa asmatu, irudiak grabatu, editatu eta jendaurrean aurkezteko. Argazkian, hainbat gazte grabazioa egiten Ikus-entzunezkoen Rallyaren iazko edizioan / Topagunea.Topagunekoen hitzetan, "Eibarren, Laudion eta Elgetan parte hartu zuten gazteek argi erakutsi duten moduan, gazte euskaldunen artean badago hori eta gehiago ere egiteko irudimena eta gaitasuna. Halaxe erakusten dute urtez urte teknika zein eduki aldetik etengabe hobetuz doazen lanak". Sormen eta gaitasun horiek behar bezala saritu behar direlakoan, urtero bezala, nabarmentzeko moduko hiru sari banatuko dira Kameratoian aurkeztutako lanik onenen artean: 1.500, 1.200 eta 900 eurokoak, hain zuzen ere. Parte hartzeko baldintzak ez dira gehiegi: gazte euskalduna izatea (lanak euskaraz aurkeztu behar dira eta), bideoa ekoizteko kamera, ordenagailua eta beharrezko tresneria izatea, eta izena ematea, azaroaren 28a baino lehen. Iazko bideari jarraiki, informazioa zuenean jaso nahi dutenentzat, bloga ere jarri dugu martxan. Blog horretan, lehiaketaren oinarriak, iaz aurkeztutako lanak, izena emateko aukera eta beste hainbat jakingarri aurki daitezke. Honako hau da bere helbidea: http://www.kameratoia.com
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun