Topaketaren parte-hartzaileak koralak eta itsas anemonak ugaltzeko aldaxka egiteari eta arrainak eta koralak girora moldatzeko teknika desberdinei buruzko ikastaroak izango dituzte. Hitzaldiak ere egongo dira, arrezifeko koralak zelan banatu bezalako gaiak aztertzeko, eta mahainguruak ere egingo dira arrainontzietako argiztapenaz edo mantenu teknikak hobetzeko garrantziaz. Horiekin batera beste era bateko jarduerak izango dira, besteak beste, Getxo Aquariumera bisita gidatuak eta argazki-raid bat ere.
Asteburuan dohakoa izango da Getxo Aquariumean sartzea
2008ko aza. 13a, 10:16
Kirol Portuko Getxo Aquariumean eta udal bela eskolan egingo da asteburu honetan, hilaren 15ean eta 16an, Espainiako Itsas Akuariozaleen I. Batzarra. Ehun lagun inguru, guztiak arrainontzi baten jabeak direla, ekimen horretan bilduko dira Getxo Aquarium gaur egun kudeatzen duen enpresak eta sektoreko saltoki espezializatu batek antolatuta, Getxoko Udalaren laguntzaz. Iberiar penintsulako leku askotatik, hala nola, Cadiz, Malaga, Huelva, Sevilla, Bartzelona, Lleida, Girona, Gipuzkoa, Araba eta Bizkaitik etorritako zaletuak dira. Horietako askok, gainera, izen handia daukate zaletasun honetan, udal iturriek aipatu dutenez. Topaketari begira, asteburu osorako egitaraua antolatu dute. Ikastaroak, hitzaldiak, mahainguruak eta beste hainbat jarduera ludiko osagarri prestatu dituzte batzarraren harira. Jarduera hauek parte hartzaileentzat izango badira ere, ekitaldia baliatuta Udalak ateak zabalik jardunaldia antolatu du, eta hortaz, asteburu osoan zehar akuarioan sartzea dohakoa izango da bisitari guztientzako. Argazkian, hainbat zinegotzi akuarioan, aurreko batean, aditu baten azalpenei adi / Urtzi Altube - Ilanda.eu.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun