Oraindik Avanzadarako "irtenbide zehatzik ez" izatea egotzi diote Leioako Udalari
2008ko aza. 14a, 20:20
Avanzadaren Estaltzearen aldeko Plataformak 2.000 sinadura inguruk babestutako idatzia aurkeztu zuen irailaren 25ean Leioako udaletxean. Eneko Arruebarrena alkateak emandako erantzuna, ordea, ez zaie "nahikoa" iruditu auzotarrei eta egunotan eskuorriak banatzen ibili dira kalean. Euren hitzetan, errepide horretarako "ez dago proiekturik, ez esleitutako aurrekonturik, ezta soluzio zehatzik ere". "Ordezkari instituzionalek komunikabideetan adierazpenak egin badituzte ere, badirudi Leioako bizilagunok Avanzada eta bere ondorio ezkorrak (kutsadura akustiko ikaragarria, herriaren haustura…) luze pairatuko ditugula", tamaldu dutenez. Hori dela eta, "Udalak 1999an adostutakoa oinarri moduan hartuta, gure herriaren egungo egoerara egokitutako Avanzada estaltzeko proiektuarekin zerikusia duten eta bere ardura diren aldeak (aurrekontua, proiektua…) zehatz ditzala", eskatu diote Arruebarrenari. Baita Bizkaiko Foru Aldundiaren arduren "jarraipen aktiboa" egin dezala ere. Azkenik, Avanzadaren estaltzea gauzatzeko Udalak foru erakundearekin egindako gestioen egungo egoeraren eta proiektuaren etorkizuneko faseen "berri zehatza" ematea eskatu diote. Argazkian, errepide gaineko igarobidea.Plataformako kideen hitzetan, laburbilduz, honako erantzuna jaso dute alkatearen partetik: batetik, Osoko Bilkurak 2007ko azaroaren 29an egindako batzarrean ondorengo proposamen hau onartu zela: “Leioako Udalaren osoko bilkurak, Avanzada errepidearen titularra den aldetik, erakunde eskuduna den Bizkaiko Foru Aldundiarekin daukan konpromisoa berrituko du, aukera teknikoek baimentzen dituzten tarteetan Avanzada lurperatu edo estaltzeko behar bezalako irtenbidea adosteko asmoz”. Ondorioz, gai horri buruz duen iritzia "dagoeneko Udalak azaldu duela" adierazi die. Azkenik, Bizkaiko Foru Aldundiak “proiektua idatzi ondoren, Udal honek, horren berri duenean, proiektua zabaldu eta, hala badagokio, egokitzat jotzen dituen alegazioak aurkezteko tramitazio egokia burutuko duela” aipatu ei die.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun