Berdintasuna eta Lankidetza Udal Zerbitzuek, Mundubat gobernuz kanpoko erakundearekin batera, gaur eta bihar "El femicidio en Centroamerica. Una aproximacion desde la realidad salvadoreña" izenburuko mintegia egingo dute, Itzubaltzeta / Romoko kultur aretoan, 19:00etatik 21:00etara. Besteak beste, Sandra Guevara eta Mercedes Henriquez El Salvadoreko Las Melidas emakumeen taldeko ordezkariek parte hartuko dute. Toki berean, baina asteazkenean, hilak 19, 19:30ean “Isiltasunak ez zaitu babesten, dei iezaguzu” lelopeko kanpainaren aurkezpena izango da, tratu txarrak jasaten dituzten emakumeei 24 orduz arreta egiteko telefono zerbitzuaren berri zabaltzeko. Doakoa eta isilpekoa da. 900 840 111 telefono zenbakiaren bidez, emakume biktimei babes emozionala, informazioa eta orientazioa ematen dizkie. Getxoko Udalak 1.500 triptiko banatu ditu kanpainari buruzko informazioarekin.
Azaroak 25
Emakumeenganako Indarkeriaren Aurkako Nazioarteko Egunerako aurreikusitako ekitaldien artean, Getxo udalerriko emakume taldeek elkarretaratzea antolatu dute Areetako Bizkaia Zubiko plazan, 19:30ean. Ordu laurden lehenago trapezio erakustaldia izango da Alzukillas taldearen eskutik. Gainera, 60 udalerrirekin batera, "ekimen berritzailea eta bateratua" izango da eta horretan emakumeek jasaten duten indarkeriaren kontrako jarrera agertzeko herritar guztien partaidetza beharrezkoa izango da, tokiko iturrien arabera.
Azkenik, azaroaren 27an, Iñigo Iturrate Bizkaiko Foru Aldundiaren Berdintasunerako eta Herritarren Eskubideetarako zuzendariak “Rolak birdefinitzea: maskulinitatea, gizonak eta indarkeria” hitzaldia eskainiko du Itzubaltzeta / Romoko Ibar Nagusien Etxean, Lope de Vega kaleko 12 zenbakian, 19:00etan.
Aipatutakoez gain, eta bigarren urtez jarraian, DBHko hirugarren mailako ikasleei zuzenduta, emakumeenganako indarkeria saihesteko eskola egitaraua eramaten ari da aurrera. Udalerriko 5 ikastetxetako 19 gelek hartzen dute parte eta, horretan, “partaidetza bultzatzu, maitasun ereduak zalantzan jartzen dituzte, indarkeriaren arrazoiak aztertzen dituzte edo eraso sexistak identifikatzen dituzte”, Eigurenen arabera.
Pankarta udaletxean
Getxoko Udalak kanpainari buruzko 31.000 hiruorriko etxeetara bidaliko ditu, baita 200 kartel jarri ere. Gainera udalerriko metro geltokietako makinetan publizitatea ipini du eta hilabete honetako "Emeki" udal argitalpena indarkeria sexistaren aurka gizonek eduki behar duten paperari buruzkoa da. Era berean, tokiko erakundeak lehen aipatu agiri instituzionalean hartutako konpromisoa betez, azaroaren 25ean pankarta bat jarriko dute udaletxean. Horretan honako hau irakurri ahal izango da: "No a la violencia contra las mujeres / Emakumeenganako indarkeriari ez!".
Emakumeenganako indarkeriaren aurrean gizonek eduki behar duten paperari buruzko hausnarketa bultzatu nahi du Getxoko Udalak
Berdinsareak sustatutako "Nik emakumeenganako indarkeriari ez, eta zuk?" lelopeko kanpainarekin bat egin eta, azaroaren 25eko Emakumeenganako Indarkeriaren Aurkako Nazioarteko Egunaren harira, hainbat ekitaldi antolatu ditu Getxoko Udalak. Aurten, azken udalbatzan aho batez onartutako agiri instituzionalarekin batera, indarkeria sexistaren aurkako borrokan gizonek izan behar duten paperari buruzko hausnarketa bultzatu nahi dute. “Gizonek hausnartu behar dute nolako balioak jendarteratzen ari diren, eta sexismoak nola baldintzatzen duen emakumeak berdintzat jotzen ez dituen maskulinitatearen eraikuntza. Indarkeria sexistaren aurka borrokatzeko eta jendarte parekidea lortzeko estrategien bilaketan, modu aktiboan laguntzeko konpromisoa hartu behar dute gizonek”, adierazi du gaurko prentsaurrekoan Keltse Eiguren Aukera Berdintasun zinegotziak. Jardueren bitartez hausnarketa eta ezagutza sustatu nahi ditu Udalak, emakumeen aurkako indarkeriaren gai batzuk aztertuz. Eigurenek ekitaldietan parte hartzera gonbidatu ditu emakume eta gizon getxoztarrak. Argazkian, Areetako Xake plazan iaz egindako elkarretaratzea / Urtzi Altube - Ilanda.eu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun