Getxoko Erakusleihoen Lehiaketan izena emateko epea zabalduko dute bihar
2008ko aza. 17a, 19:01
Getxoko Erakusleihoen Lehiaketaren 18. edizioan izena emateko epea bihar ireki eta abenduaren 9ra arte egongo da zabalik. Getxo Enpresa eta Merkataritza (GEEM) erakundea da antolatzailea. Lehiaketan parte hartzeko deialdia merkataritza, ostalaritza eta zerbitzuetako udalerriko enpresa guztientzat da. Alde batetik, erakusleiho fisikoen kategoria dago, eta han sartzen dira jendeak kanpoaldetik ikusten dituen establezimenduko elementuak; bestalde, erakusleiho birtualen kategorian, batez ere, enpresen web-orriak daude. Lehiakideek nahi badute ez dago inolako arazorik aldi berean bi kategoria horietan parte hartzeko. Izena ematea telefonoz, faxez, posta elektronikoz edo GEEM elkartearen egoitzan egin daiteke. Sariak "oso interesgarriak" direla adierazi dute antolakuntzatik. Besteak beste, bidaiak, PDAk eta sakeleko telefonoak, Gabonetako otzarak, publizitatea komunikabide batzuetan, kafe loteak edo garaikurrak banatuko dituzte. Argazkian, Algortako Zurikalday gozotegiak irabazi zuen iaz lehiaketa. Guztira 18 sari banatuko dira: 12 sailkapen orokorraren barruan eta bost sailkapen berezietan. Horien barruan sartzen dira merkataritza, ostalaritza eta zerbitzuetako sektoreetako erakusleihorik onenentzako aipamenak, mezuaren eraginkortasunaren aipamena edo erakusleiho birtual onenarena. Halaber, sarien zozketa bat egingo dute parte hartzen duten enpresa guztien artean. Epaimahaiko kideak dekorazioaren, erakusleihoen antolakuntzaren, diseinuaren, teknologia berrien eta kontsumoaren arloetako profesionalak izango dira, baita erakunde eta enpresa babesle eta erakunde antolatzaileko kideak ere. Erakusleihoen ebaluazioa abenduaren 10etik 14ra bitartean egingo da. Hiru egun geroago, abenduaren 17an, Getxoko XVIII. Erakusleihoen Lehiaketaren sarien banaketa izango da. Iazko edizioan 150 enpresa baino gehiagok parte hartu zuten, eta antolatzaileek uste dute aurtengo edizioan kopuru hori handitu egingo dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun