"Sekula ez da goizegi antzerkira hurbiltzeko, umeek ondo pasa dezaten eta beraien irudimena eta sentiberatasuna modu dibertigarrian gara ditzaten", Leioako kultur iturriek diotenez. Gauzak horreta, aita-amak zein seme-alabak aste bukaerarako prestatutako ekitaldietara hurbiltzeko gonbidatu dituzte: "zure umea eta zu antzerkian esperientzia magikoa izatea nahi baduzu hurbildu zaitez asteburu honetan Kultur Leioara", adierazi dute. Bertan 0 eta 3 urte bitarteko umeentzat zuzendutako “Lehen aldia” antzerki zikloa izango da. Horrenbestez, larunbat horretan eta igandean, Frantziako Carre Blanc konpainiaren "Chiffonnade" eta Paraiso Teatroren "Lorategian" lanak egongo dira ikusgai, hurrenez hurren. Bakoitzeko bi saio egingo dituzte: bata 12:00etan eta bestea 18:30ean. Gauzak horrela, Paraisoren azken saioa euskaraz izango da. Sarrerak 4 eurotan jarri dituzte, heldua eta haurra txartel bakarra hartuta. Bestalde, abenduaren 26tik 30era bitartean, haur antzerkiaren erakustaldia egingo dute. Argazkian, “Chiffonade” antzezlana.
Larunbatean, “Chiffonade” lana izango da ikusgai, Frantziako Carre Blanc konpainiaren eskutik. Aipatu obra koreografia bat da, eta, bertan, oihala erabiltzen da material gisa. Oihala ukitu, tximurtu, tolestu edo urratu egin daiteke, eta oihalarekin janzten edo mozorrotzen gara. Esfera baten barruan, pertsonaia bat dago. Biraka eta biraka, oihalak dantzarako kide eta eraikuntzarako material bihurtzen dira. Igandean, berriz, Euskadiko Teatro Paraiso konpainiako “Lorategian” lanaren txanda izango da. Emakume bat lorategian jesarrita, amets egiten. Gizon bat heltzen da eta irudien mundutik bidaiatzera gonbidatzen du. Bien artean, oihal bat deskubritzen dute zuhaitzen artean. Oihal hori orri zuri bihurtzen da, eta, bertan, irudiak sortzen eta eraldatzen hasten dira emozioak plazaratuz eta islatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun