Jaialdian toki desberdinetatik etorritako eskarmentu handiko sei talde entzuteko aukera egongo da eta horiek musika eta dantza tradizionalaren erakustaldia eskainiko dute. Lehenengoz, Spraoi, Irlandatik heldutako musikari eta dantzari gazteek osaturiko taldea izango da, guztiek musika instrumentu bat baino gehiago eta dantza ezberdinak menperatzen dituztela. Jaialdian Irlandako zenbait musika pieza tradizional eskainiko dituzte. Italiako hegoaldetik Menta Fresca Danza taldea izango da, mendeetan izandako zibilizazio grekoaren eragina erakusteko. Galiziako Pandeiro Furado laukoteak muñeirak eta jotak dantzatuko ditu. Horretarako, kantua, panderoa, perkusioak eta gaita izango dituzte lagun. Bitartean, Euskal Herriko hiru ordezkari izango dira jaialdian. Alde batetik, Igorreko Arantzarte dantza taldeak Arratia inguruko errepertorioa eskainiko du, musika eta dantzaren bitartez. Bigarrenik, Gipuzkoako Sasi Dantza ikusteko aukera egongo da seikote baten eskutik, Alkorta anai-arrebarekin soinuan. Azkenik, Ipar Euskal Herriko Zpeiz Mukaki taldeak, 15 gaztek osatuta, euskal dantzari gaurkotasuna emango dio.
Trikisesioa
Jaialdia 20:00etan hasiko da eta 22:30etik aurrera "Trikisesion" izenarekin bataiatutako emanaldia izango da Areetako Glass kafetegian, doako sarrerarekin. “Bertan Jaialdian parte hartu dutenek joko dute, bakarka, nahiz elkar hartuta. Gainera, artistek ez ezik, herritarrek ere parte hartu ahal izango dute, soinua eta panderoa eramanez, han jotzeko eta denen artean giro polita sortzeko”, azaldu du Naiara Billalabeitia Bizkaiko Trikitixa Elkarteko ordezkariak. Aurkezpen ekitaldian ere izan den Jon Iñaki Zarraga Bizkaiko Foru Aldundiko Kultura zuzendariak ekimenari eskainitako laguntza izan du hizpide, “Aldundiak euskal kultur adierazpen guztiak sustatzeko interesa duelako”.
Nazioarteko Trikitixa Jaialdiak emango die hasiera ostiralean Getxoko Euskal Kulturaren Jardunaldiei
VII. Nazioarteko Trikitixa Jaialdia ostiral honetan, azaroak 21, izango da Areetako Andres Isasi Udal Musika Eskolan. Hain zuzen ere, ekitaldi horrek emango die hasiera tokiko Euskara Zerbitzuak antolatzen dituen Euskal Kulturaren X. Jardunaldiei. Hirugarren urtea da ekitaldia udalerrian egiten dena. Aurretik Bilbon izaten zen eta, gainera, aurten aurrenekoz aukeratu dute Areeta berau ospatzeko. “Lehenengo aldiz, hurrengo egunean Donostiako Kursaalean eskainiko duten egitarau osoa entzun ahal izango dugu Getxo udalerrian, aurrekoetan horren aukeraketa izan baita soilik. Oraingoan musikaz gain, dantzak ere ikusi ahal izango dira. Gure udalerrian izango den beste berezitasun bat jaialdia amaitutakoan izango den 'Trikisesioa' izango da”, azaldu du prentsaurrekoan Koldo Iturbe Euskara zinegotziak. Hain zuzen ere, 20:30ean abiatutako Spraoi (Irlanda), Menta Fresca Danza (Italia), Pandeiro Furado (Galizia), Igorreko Arantzarte Dantza Taldea, Gipuzkoako Sasi Dantza eta Ipar Euskal Herriko Zpeiz Mukaki taldeen emanaldiaren ostean; 22:30ean, Glass kafetegian joko dute guztiek. Sarreren prezioa 6 eurokoa izango da (musika eskolarako bakarrik) eta ohiko tokietan daude salgai, hau da BBKren kutxazainetan, Kultur Etxean eta udal web gunean. Argazkian, soinu eta panderoa ezinbesteko tresnak bilakatu dira Euskal Herri osoko ospakizunetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun