"Confebask: lapurren erregea. Langileok: autodeterminazioa!" lelopeko elkarretaratzea egingo du bihar, azaroak 19, LAB sindikatuak Bilbon. Hitzordua goizeko 11:30ean jarri dute, Euskalduna Jauregiaren inguruetan, bertan Araba, Bizkaia eta Gipuzkoako Confebask enpresarioen elkarteak bere 25. urteurrena ospatuko baitu, 1.000 gonbidatu baino gehiagorekin, tartean Juan Carlos Borboikoa Espainiako erregea eta Juan Jose Ibarretxe Euskal Autonomi Erkidegoko lehendakaria. Iratxe Azkue Eskumaldeko LABeko kideak UKBERRI.NETi adierazi dionez, aipatu protestak bi helburu ditu. Lehenengoa, 25 urte hauetan eta "are gehiago krisialdi garai" hauetan, patronalak "langileon eskubideen eta lan baldintzen aurka" izan duen papera salatzea da. Izan ere, LABen aburuz,"langileon kalterako sorturiko elkarte patronal honek, instituzioen laguntzarekin, neurri gogorragoak planteatu ditu, berriro ere langileok ordain ditzagun neokapitalistek eragindako krisiaren kalteak. Hori gutxi balitz, Espainiaren zapalkuntza ordezkatzen duena ere gonbidatu dute". Espainiako erregea Euskal Herritik kanpora joatea ere eskatuko dute. Argazkian, eskuman, Espainiako erregea ariketa militar batzuetan / Jaume D'Urgell.
Horretaz, gain, sindikatu abertzaleak salatu du "mobilizazioa burutzeko Ertzaintzak jarri dizkigun arazoak, ziurtasunaren aitxakiarekin ahalik eta hurrunen bidaliz, patronalaren eta erregearen arteko biharko argazkia ez izorratzeko". Azkenean, Casilda Iturriza parkearen inguruan (Paseo Eduardo Victoria de Lecea, Sheraton ondoan) izango da ekimena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun