Nabigatzailearen Eguna, ekitaldi askorekin bete dute: batetik, Itsas Museoaren ateak zabalik izango dira egun guztian zehar; hortaz, nahi duenak libre izango du bertako erakusketak eta instalazioak bisitatzea. "Thalassa" bergantin belaontzia bisitatzeko, euro bat besterik ez da ordaindu beharko. Halaber, goizean, umeentzako tailerrak izango dira museoaren kanpoaldean, eta haurrei zuzenduta ere, jolasak egongo dira (Gargantua, erraldoiak eta abar). Horretaz gain, Baserritarren Azoka egingo da, 11:00etan hasi eta 15:00etara arte, 30 bat postu izango direlarik. Gainera, Iruña Catering etxearen eskutik, sardina-jana dohainik izango da, 13:00etatik aurrera.
Egun guztian zehar, denetariko jakiak dastatzeko modua izango da. Halaber, txosna zabalduko dute, taloa eta itsasoko produktuez hornitzeko, prezio herrikoiekin gainera. Museoaren kafetegian bertan ere mokadu bat hartzeko aukera izango da. Ekitaldiok guztiok musikaz aberasteko, goizean Garaizarko Matsorriak korua eta Turutarra fanfarrea arituko dira. Nabigatzailearen Egunaren antolaketa lanetan hainbat talde eta elkarte jardun dira, hala nola, Orza Elkartea, Bilboko Portuko Agintaritza, Bilboko Udala, BBK, Arriluzeko Gurutze Gorria, Iruña Catering eta Smith & Smith.
Nazioarteko Kayak Jaitsiera
Bien bitartean, dagoeneko zabaldu dute epea Bilboko Herri Maratoia Klubak (BHM) eta Bilboko Konpartsek antolatutako Nerbioi ibaiaren III. Nazioarteko Kayak Jaitsieran izena emateko. Proba igande honetan, 11:00etan, abiatuko da Uribitarteko ibiltokitik, Bilboko udaletxe paretik. Kirolariek 12.500 metro luzerako bidea egin beharko dute Getxoko Kirol Porturaino. Antolatzaileek zehaztu dutenez, 15 urte baino gehiago izatea da inskribatzeko baldintza bakarra. Izan ere, ez dute kontuan hartu federatua egon hala ez. Gauzak horrela, ostiralera arte (hilak 21) egongo da izena emateko aukera, BHMren bulegoan (Jose Maria Olabarri, 6 - 2 / Bilbo), telefonoz edo faxez (944 236 575) edo e-posta bidez (bhm[abildua]@clubbhm.com). Horrela eginez gero, 5 euro baino ez dira ordaindu behar izango. Egunean bertan eginda, ordea, 10 euro.
Nabigatzailearen Eguna eta kayak jaitsiera hartuko ditu asteburuan itsasadarrak
2008ko aza. 19a, 13:43
Bilboko Itsasadarra Itsas Museoak zabaldu zeneko bosgarren urteurrena beteko du larunbat honetan, azaroak 22. Hori dela eta, Nabigatzailearen Eguna antolatu du, egun horretan museoaren ateak zabalik izango direla. Halaber, ekitaldi ugari prestatu dituzte egun osorako, besteak beste, ontzien ibilaldia itsasadarrean gora, museoraino bertaraino. Arduradunek jakinarazi dutenez, deialdi honetan parte hartuko duten ontziak 10:30ean aterako dira Getxoko Kirol Portutik. Ibilaldian denetariko ontziek parte hartzerik izango dute; baldintza bakarra da aurretik izena ematea, museora bertara deituta (946 085 500) edo Orza Elkartera bestela (606 503 531), kirol portuan bertan. Baina larunbatekoa ez da itsasadarrean egingo den itsasaldi bakarra izango: igandean, hilak 23, Nerbioi ibaiaren III. Nazioarteko Kayak Jaitsiera egingo dute, 11:00etatik aurrera, Bilbon hasi eta Getxoko Kirol Portuan bukatuta. Argazkian, iazko jaitsieraren irudia.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun