Euskal webgunetzat hartuko da Bizkaian, Gipuzkoan, Nafarroan, Araban, Zuberoan edo Lapurdin egoitza edo jatorria duen enpresa edo norbanako batek egindakoa. Euskal diasporako internautek sortutako webguneak ere onartuko dira, haien gaiek Euskal Herriarekin zerikusia badute. Epaimahaia ospe handiko hamar euskal internautek osaturik egongo da, eta internautek aurrez aukeratutako bost webguneak bozkatuko ditu. Aukeratzeko irizpideak izango dira, besteak beste, egindako ahalegina, kalitate artistikoa, diseinua, egituraketa, erabilgarritasuna, irisgarritasuna, negozioko edo zerbitzu publikoko ikuspegia eta edukiaren aberastasuna.
Blas Pedro Urberuagak Interneten erabilitako "nick" edo ezizena da "Buber". Idahora (AEB) emigratutako euskal artzainen semea da bera, fisikaria. 1994an, artean 23 urte besterik ez zuela eta Internet jaio berria zela, Euskal Herria gai bakartzat zuen lehenengo webgunea sortu zuen. Haren orriak euskal kulturari buruzko erreferentzia bakarra izan ziren Interneten urte askoan zehar.
Internet&Euskadi elkarteak euskal webgunerik onenentzako Buber Sarien seigarren edizioa jarri du abian. Euskal Herrian tradiziorik eta oihartzunik handieneko sari digitalak dira horiek dagoeneko, antolatzaileen arabera. Parte-hartzea librea da eta abenduaren 3ra bitartean edozein norbanakok, enpresak edo erakundek aurkez dezake bere hautagaitza sariketako kategorietako batean, http://buber.interneteuskadi.org/web/ webgunean. Web bakoitzak kategoria bakar batean parte har dezake edizio bakoitzean. Honako hauek dira kategoriak: webgunerik ikusgarriena; webgunerik erabilgarriena; webgunerik dibertigarriena; webgune berritzaileena; webgunerik irisgarriena; euskara sustatzeko webgunerik onena; merkataritza elektronikoko webgunerik onena; herritarrei zerbitzua emateko webgunerik onena. Argazkian, ezkerretik eskuinera, Blas Pedro Urberuaga "Buber" eta azken udal hauteskundetara arte Sopelako zinegotzi jelkide izandako Ricardo Ibarra / Alorza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun