"Parte hartze zuzeneko" batzorde hori auzo elkarteek, alderdi politikoek, udal arduradunek eta Bizkaiko Garraioa Partzuergoak osatuko lukete, Almansaren aburuz, "kaltetutako bizilagunen kexak eta gomendioak bideratzeaz gain, guztion artean irtenbide egokiena aurkitzeko asmoz". "Izan ere, obrak hasi besterik ez dira egin. Domingo Iturrate kalea hartu eta Maidagan kalea mozten dutenean are larriagoa izango da egoera. Bi urte baino gehiago iraungo dute lanok", arranguratu da Getxoko PSE-EEren eledunak. Aipatu duenez, "babesik gabe eta abandonatuta" sentitzen dira auzotarrak. Hori dela eta, batzordea abendurako abian egotea nahi du konstituziozaleen zinegotziak.
Ibarbengoa beharrean Getxo
Almansak "Iberberango" izena aipatu duen arren, Ibarbengoa deitu nahi dioten Bidezabal eta Berango arteko metro geltokiari, "Getxo" deitura jartzea ere eskatuko du azaroaren 28ko udal batzarrean, mozio bidez, Getxoko PSE-EEk. Izen hori zeukan antzinako geralekua kendu ez zezaten, "auzotarrek egindako borroka aintzatetsi eta udalerriak galdutako izendapena berreskuratu" nahi dute horrela. Almansarekin batera prentsaurrekoan egon den Iñaki Egaña Bizkaiko Batzar Nagusietako PSE-EEren ordezko bozeramaileak adierazi duenez, Getxoko Udalbatzak bi proposamen horiek onartzekotan, eurak arduratuko dira "beharrezko izapideak" egiteaz.
Maidagango pasonibela lurperatzeko lanen gaineko batzorde berezia eratzea eskatu du Getxoko PSE-EEk
Maidagan kaleko trenbide-pasagunea lurperatzeko lanak direla eta, auzokideak "kalbarioa" sufritzen ari direla salatu du gaur Getxoko PSE-EEk. Luis Almansa alderdi horren bozeramailearen arabera, Andra Mariko Auzo Elkartearen kideen ahotik eta helarazi dizkieten argazkien bitartez jakin dute obrek "eragozpen eta kalte handiak" eragiten ari zaizkiola bizilagunei. Besteak beste, makinak eta kamioiak estratak "arpilatzen hasi" direla, segurtasun hezirik ez dagoela, ehun urtetik gorako haritzak ebaki dituztela eta "oraindik eragotzi ezin izan duten" arratoi izurritea eragin dutela aipatu du Almansak; baita hori frogatzeko auzotarrek emandako irudiak erakutsi ere. Hori dela eta, antena edo uholdeekin egin bezala, Maidagango pasonibela lurperatzeko lanen gaineko batzorde berezia eratzea eskatuko du azaroaren 28ko udal batzarrean Getxoko PSE-EEk. Argazkian, auzokideek Getxoko PSE-EEri helarazitako irudian, hainbat gazte obren inguruan jolasten, "horrek dakarren arriskuarekin".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun