Algortako Ereaga hondartzako La Terraza jatetxe aurrean, errepidearen bestaldean dagoen turismo bulego nagusia Kirol Portuko sarrerara aldatzea eskatuko du, azaroaren 28ko udal batzarrean, mozio bidez, Getxoko PPk. "Gobernu Taldeak berak onartu du egungo bulegoa txiki geratu zaiela eta, egoera txarrean egon arren, ezinezkoa dela konpontzea", azaldu du gaur Marisa Arrue popularren bozeramaileak. Tokiko gobernuak, ordea, La Terraza bota eta bertan altxatzeko asmoa daukaten eraikinean jarri nahi du. PPkoen ustez, bisitarientzat "eskuragarriago" egongo litzateke turismo bulego berria, itsas bidaietako ontzien atrakalekutik hurbil eta "udalerrian izango dugun hotel esanguratsuenaren -Begoña gazteluko galerietakoa-" jarriko balute. Argazkian, Ereaga ondoko turismo bulegoa.
Bestalde, Jesus Toca-Toña zinegotzi popularrak "zuzenean" egiaztatutakoaren arabera, Aurriluzera bidean sartzen diren bost autoetatik lau Kirol Portura joaten dira, eta bakarra Ereaga hondartza ingurura. Bitarean, Bizkaia beste udalerrietan ez bezala, Getxon turismoak gora egin duela aipatu du Arruek, euren eskaeraren "premiaz" ohartarazteko. Bulego berria "hasieran heliportua jartzeko egin zen eta egun hutsik dagoen zabaldegian" jarri nahi du Getxoko PPk. Eraikinaren ezaugarriei dagokienez, "modernoa izan eta inguruko eraikuntzekin bat etorri beharko luke", popularren iritziz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun