Ikasle Abertzaleek larunbat honetan, azaroak 22, ospatuko dute Ikasle Eguna, Erandion. Urtero antolatzen du aldarrikapen eta festarako egun handia IAk, baina aurten bikoitza izango da ospakizuna: 20 urte bete ditu aurten euskal ikasleen antolakundeak. Besteak beste, euskal ikasleen topaketak; erraldoi, buruhandi eta trikitilariak; puzgarriak eta jolasak; pailazoak; musika maratoia; bazkaria eta bertso-postrea; elektrotxaranga; manifestazioa eta ekitaldia... izango dira larunbat guztian zehar. Karpa handiko kontzertuetarako (Anger, Piperrak, Obrint Pas, Soziedad Alkoholika, eta Amaiur), berriz, 22 euro ordaindu beharko dituzte aldez aurretik txartela hartu ez dutenek. Argazkian, larunbatean bertan joko duten musikariekin batera egin zuten prentsaurrekoa, azaroaren 8an, Bilboko Kalderapeko kultur gunean, IAko kideak.
Goizean goizetik, euskal ikasleon topaketak egingo dituzte. "Elkarregandik ikasiz, Euskal Eskola Nazionala eraikitzera iritsiko garelako, Euskal Herriko ikasleok elkarren esperientziak konpartituz, elkarregandik ikasteko aukera paregabea izango dugu", Ikasle Abertzaleek azaldu dutenez. Era berean, Hezkuntza Sistema Nazionalaren guneari irekiera emango zaio 11:00etan, erraldoi, buruhandi eta trikitilariekin. Ondoren, kalejira izango da erraldoi eta buruhandiekin. Bitartean, gunean bertan umeentzako jolas eta puzgarriak izango dira, eta eguerdiko 12etan pailazo emanaldia hasiko da. Ordu bietan, berriz, bazkaria egingo dute. Eta horren ostean bertso saioa izango da Amaia Agirre, Maialen Arzallus, Iratxe Ibarra eta Onintza Enbeitaren eskutik. Bertso saioa bukatzean, 3indarrok elektrotxarangarekin kalejira izango da herrian zehar, eta era berean, 17:00etan musika maratoia egongo da Hezkuntza Sistema Nazionalaren gunean. Egitarauarekin jarraituz, 19:30ean manifestazioa egingo dute, eta ondoren ekitaldi politikoa izango da. Azkenik, 21:00etan hasiko dira kontzertuak. Karpa handian Anger, Piperrak, Obrint Pas, Soziedad Alkoholika, eta Amaiur izango dira entzungai; eta karpa txikian, Aritz Sound Sistem eta Dj Bull-ek girotuko dute gaua. Karpa handirako sarrera 22 eurotan egongo da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun